Shillong: Ka Meghalaya Pradesh Mahila Congress ha ka jingialam ka kong Joply S.Shylla ka pynpaw ïa ka jingsngewkhia kaba jur halor ka jingkren bymman jong u Myntri Rangbah ka Assam, u Himanta Biswa Sarma.
Ha ka kyrwoh ka Meghalaya Pradesh Mahila Congress (MPMC) ka pynpaw ka jingpyrshah kaba jur bad ka jingbitar kaba khraw halor ka jingkren khlem akor jong u Myntri Rangbah ka Assam, u Himanta Biswa Sarma, uba la kynnoh ba ki kynthei ki iohkam sorkar da kaba die ïa ka met lajong bad kane ka jia ha ka por ba synshar ka Congress ha Assam ha ki 15 snem mynshwa.
Kane ka jingkren ka long kaba shah pynjah burom, ka pynsniew dur ïa ki kynthei ïa ka jingïaleh jong ki ban ïoh ka burom, ka hok bad ka jingshaniah ha ka imlang sahlang. Ka long ruh ka jingjia kaba pynduh mynsiem ïa ki kynthei kiba trei shitom ban long ki nongïalam bad ban kiew ha ka kam ka jam da ka akor bad ka jingstad.
Halor kane ka Meghalaya Pradesh Mahila Congress ka dawa ba u Himanta Biswa Sarma un ai ka jingpan map paidbah halor ka jingkren khlem akor. Ka kyntu ïa ki bor synshar bad ki bor ka Women’s Commission ba kin shimkhia bad pynshitom katkum ka ain bad ka khot sngewbha ïa ki kynthei na baroh ki liang saiñ pyrthei ban ïeng lang ban pyrshah ïa ki jingkren pynjah burom kum kine.
Ki kynthei kim dei ban shah peit poh ne shah kren bein .Ka Mahila Congress ka long ha ka jingïakhun ban pynneh ïa ka burom bad ka jingïatylli jong ki kynthei ha baroh ki liang.
Lah ban kdew ba u Himanta ula kynthoh ba u la pynpaw ia kane katkum ka jinglap ha ka kaiphod jong ka Justice (Retd.) Biplab Kumar Sharma Commission bad kam dei ka jingkren na u.
U la ong ba lada ka Congress ka dei ban rah ia kane ka jingujor jongka sha ka Commission lada ki shem ba ka kaiphod ka long ka bym iahap.
U Sarma ula ong ia kane haba ha ka por ba u ialap elekshon panchayat ha Assam kaban long ha ka 2 bad 7 tarik u Jymmang 2025.
Dawa panmab ka Mahila Congress Meghalaya na u Himanta ba kynnoh ba ioh kam sorkar ki kynthei da kaba die met
