Shillong: Hapdeng ka jingiakynad kaba jur, u myntri ka tnad sam jingtip ka Pakistan u Attaullah Tarar ula kam ba ki shipai ka India ki lah ban khyrwit ia ka Pakistan ha kine ki 24-36 kynta kiban wan katkum ka jingtip na ka bor syntiat.
Kane ka jingkren u myntri ka Pakistan ka long hadien ba u Prime Minister u Narendra Modi ula ai bor pura ha ki bor shipai ka ri ban leh ia kaba donkam, kum ka jubab ia ki riew pyntriem kiba pyniap ia 26 ngut ki nongleitkai ha Pahalgam.
Katkum ki tyllong khubor, u Tarar u la ong ba ki bor shipai ka India kila pynkhreh ban hiar thma tang namar ka jingkynnoh bad suba sniew ia ka jingdonkti ka Pakistan ha ka jingleh ki riew pyntriem ha Pahalgam.
U la ong ba ka Pakistan ka la long langknia na ki kam riew pyntriem bad ka pang mynsiem ia ka jingshah kren bein halor kane. Ha ka jingshisha, u la ong, ba ka Pakistan ka la pynrem jur ia ki kam ki riew pyntriem kylleng ka pyrthei.
U Tarar ula kynthah ba ka India ka la leh ialade kum u nongbishar bad u nongpyntreikam ha kane ka thain, wat ha ka jingshisha ka Pakistan ka la tyrwa ban don ka jingtohkit da ka kynhun ba laitluit halor ka jingjia ban tih bad sei madan ia ka jingshisha.
Hapoh 36 kynta yn khyrwit ka India ia ka Pakistan, ong u myntri ka Pakistan
