Shillong: Ka Mahila Morcha BJP, Meghalaya Pradesh ka la ther tyngeh ka Meghalaya Mahila Pradesh Congress kaba la pyrshah ia ka jingkhang dukan mon sngewbha ki paidbah ha Shillong ban pynrem ia ka jingjia ha Pahalgam, Jammu & Kashmir.
Haba pyllait kyrwoh ha ka 28 tarik Iaiong, 2025, ka President ka Mahila Morcha ka BJP Meghalaya ka kong Ka Susuki Pariat ka la ong ba haba ka pyrthei ka la shaiong ngain ia ki kam ki riew pyntriem bad ka ri ka don ha ka jingpang niangkhriat halor ka jingjia ha Pahalgam, ka Congress ka wan mih ban pyni ia ka jingpyrshah ri.
Ka la ong ba ka jingkhang dukan jong ki trai dukan ha Shillong ka dei ka mon sngewbha jongki kum ka jingsngewlem ia kito ki mynsiem kiba la khlad ha ki kam ki riew pyntriem.
Ka jingpyrshah ka Congress ia kane ka jingsngew jong ki paidbah ka pyni ba kam don jingsngew ia ka jingiam briew ka ri baroh kawei bad ka pyni ba ka long pyrshah ia ki paidbah.
Ka kong Susuki ka la ong ba kum ki longkmie ki pang mynsiem haba ki para, ki kurim ki shah pyniap pyllen pyllein ha Pahalgam bad kum ka ri ka shaiong halor kane ka kam riewkhlaw.
Kaba sngewsih ka long ba ka mynsiem pyrshah ia ki paidbah bad ia ka ri ka dang shong jylliew ha ka DNA ka Vadra-Gandhi Congress bad sa katno yn batai ia ki kyntien ka President ka Meghalaya Pradesh Mahila Congress kong Joplyn Shylla, ka bym iapher na ka jinglong kum u Manishankar Aiyyar bad u Saiffudin kiba iasaid khuid ia ka Pakistan.
‘Ka Congress kam don jingkitkhlieh ia ka ri’, pynphai nia ka BJP ba pyrshah khang dukan
