Ka WAVES Bazaar: Ka Por Lagaan jong ka India ha ka rynsan jong ka pyrthei ha ka kam media bad kam pynbyrngia

Da Aamir Khan
Ka India ka don ka bynta kaba kongsan ha ka kam pynbyrngia bad kam media, kaba nang kiew stet bad nang kiew ha ka jinglong jingman kaba iai kylla man ka por. Ngi sakhi ïa ka jingkiew ha ka jingpynmih prokram ha ki rynsan bapher bapher ba la wanrah da ka jingkiew jong ki jingshakri digital streaming, ki jingpynmih prokram ha ka ktien jong ka thaiñ, bad ki nongsngap bad nongpeit kiba stad ha ka teknoloji kiba dawa ïa ki jingïathuhkhana kiba thymmai, kiba pynïasoh, bad kiba kynthup lang. Ka long kaba kongsan ban sngewthuh ia ka lad kaba khraw ba kane ka bynta ka don na ka bynta ka ri, ym tang kum ka lad ban pynbyrngia hynrei kum ka lad kaba khlain ban pyni ia ka deiriti, ka jingkiew ka ioh ka kot, bad ka bor ha ka pyrthei. Ka World Audio Visual & Entertainment Summit, kaba la tip kum ka WAVES, kaba la pynlong da ka Sorkar India ha Mumbai, Maharashtra, naduh ka 1 haduh ka 4 tarik u Jymmang, 2025, ka kular ban long ka sakhi ïa ka jingkiew ka India, bad ka WAVES Bazaar ka dei ka bynta ba kongsan jong kane ka jingïalang. Kum u briew uba la pynlut da ki phew snem ha ka kam, nga ngeit ba ka jingiathuhkhana ka don ka bor ban pyniatylli, ban ai mynsiem bad ban pynkylla dur. Lyngba ka WAVES bad ka WAVES Bazaar, ngi shim ia ka sienjam kaba shlur ban wanrah ia ka lawei kaba kham iatreilang bad kaba kynthup lang na ka bynta ka kam pynbyrngia ha ka pyrthei.
Ka WAVES Bazaar ka pyrshang ban long ka iew online kaba thymmai kaba la saindur khnang ban pyniasoh ia ki riew shemphang, ki kam khaii, bad ki nongthaw ha ka kam pynbyrngia ha ka pyrthei. Lyngba ka thong jong ka ban kyntiew ïa ka jingïatreilang kaba ryntih, ka WAVES Bazaar ka pyrshang ban shakri kum ka jaka treikam ba kongsan tam na ka bynta ka kam Media & jingpynbyrngia, kaba pynlah ïa ki riew shemphang ban pynïar ïa ka kam jong ki, ban lap ïa ki lad ki lynti kiba thymmai, bad ban ïashim bynta ha ki jingïatreilang ba kordor bha. La plie paidbah ha ka 27 tarik u Kyllalyngkot, 2025, da u Ashwini Vaishnaw, Myntri ka tnat Information & Broadcasting, Railways, and Electronics & Information Technology, ka WAVES Bazaar kalong ka atiar ba kongsan ban pynurlong ïa ka jingthmu jong u Myntri Rangbah duh ban pynkylla ïa ka WAVES Summit sha ka jingialang kaba kyrpang ha ka kam Media bad jingpynbyrngia, kaba iadei bad ka Davos Summit na ka bynta ka kam pisa tyngka bad ka ioh ka kot.
Naduh ba la sdang, nga ngeit ba 5500 ngut ki nongthied, palat 2000 ngut ki nongdie bad kumba 1000 tylli ki projek la pynrung kyrteng ha ka portal na ki bynta bapher bapher jong ka kam M&E. Hadien habud, kyrmen ba ka portal kan kylla sha ka iew kaba pura bad ka jaka ïakynduh na ka bynta ka kam M&E, kaba don ïa ki lad ba la pyndonkam da ka AI. Kan pynlong ruh ïa ki jingïalang online, ki jingïalang B2B, ki webinar, bad kiwei kiwei, baroh hapoh ka rynsan.
Ka WAVES Bazaar ka dei ka e-marketplace kaba kyrpang kaba pynïasoh lang ïa ki nongshim bynta na kylleng ki bynta jong ka Media & Entertainment —kynthup ïa ki phlim, ki telebishon, animation, gaming, ki jingpynbna, ki XR, ki jingrwai, sound design, radio bad kiwei kiwei. Ka rynsan kan long kum ka jaka pyniasoh hapdeng ki nongthied bad ki nongdie, ban pynthikna ba ki riew shemphang ha ka kam kin lah ban pyni da kaba suk ïa ka jingtbit jong ki, ban pynïasoh bad ki nongthied, bad ban ïoh ïa ki jingïatreilang kiba don jingmut.
Lada phi dei u nongshna phlim uba wad ïa ki nongiatreilang ban pynmih phlim, u nongpynbna uba wad ïa ka rynsan kaba biang, u nongpynmih ia ki game uba wad ïa ki nongbei tyngka, lane u nongdro uba kwah ban pyni ïa ki kam jong phi sha ki nongpeitkai ha kylleng ka pyrthei, ka WAVES Bazaar ka kyrmen ban ai ka jaka kaba biang na ka bynta ki riew shemphang ha ka kam ban ïakynduh, ïatreilang, bad kyntiew ïa ki kam jong ki.
Ka WAVES Bazaar ka dei ka iew B2B kaba pynkylla dur ia ka rukom ba ka kam pynbyrngia ha ka pyrthei ka pyniasoh, ka iatreilang, bad ka kiew. Da kaba wanrah lang ïa ki riew shemphang na ka phlim, ka telebishon, ka jingrwai, gaming, animation, ka jingpynbna, bad ka teknoloji kum ka XR, AR, bad VR, ka rynsan ka ai ïa ka jaka kaba pura na ka bynta ban kyntiew kyrteng, ban lap, bad ban pynïaid beit ha kylleng ki bynta bapher bapher jong ka jingsaindur. Lada phi dei u nongpynmih uba wad ïa ka jingsam, u nongshna game uba pynmih ïa ki IP ba thymmai, lane u sound designer uba wad ïa ki lad ban ïoh laisen, ka WAVES Bazaar ka pynsuk ïa ka jingtreikam baroh kawei da ki jingpynbna ba kyrpang jong ki kyrdan, ki kamra peit ba shngain, bad ki jingdonkam ba la pynbeit ryntih.
La saindur na ka bynta ki jingiadei kam kiba iaid ryntih, ka WAVES Bazaar ka ai bor ia ki nongdie bad ki nongthied ban wad ia ki paralok bad ki lad kiba biang khlem da don ki jingkhanglad ha ka jaka. Ki nongdie—naduh ki jaka shna phlim bad ki jaka shna animation haduh ki nongthaw podcast bad ki kynhun pynïaid iew—ki lah ban pyni ïa ki jingshakri bad ki prokram jong ki sha ki nongbei tyngka na kylleng ka pyrthei, ki nongsam, bad ki nongïatreilang. Ha kajuh ka por, ki nongthied ki ioh lad ban ioh ia ki projek kiba bha, kiba thymmai, katba ki nongbei tyngka ki lap ia ki jingiateh ba iatreilang bad ki kam kiba lah ban pynheh. Ka rynsan ka plié lad ruh sha ki prokram bapher bapher kiba iadei bad kane ka kam, ki kamra peitkai, ki jingïakynduh jong ki nongbei tyngka, bad ki jingpyni live, kaba pynthikna ba ki jingïateh ba don jingmut kim sahkut ha tang ki jingïakren lyngba ki lad digital.
Ka bynta jong ka WAVES Bazaar kan long ka jingdon jong ka ha ka jingïalang jong ka WAVES Summit ha Jio Convention Centre, BKC, Mumbai naduh ka 1 tarik haduh ka 4 tarik u Jymmang 2025. Ki nongïashim bynta ba la jied na ka ïew digital kin ïoh ïa ka lad ban ïakren, ban ïakynduh, bad ban ïateh kular markhmat bad ki nongtrei ba ha khlieh duh. Naduh ki jingpyni ba la pynkhreh haduh ki jingiakren live bad ki jingialang iatreilang, kane ka jingialang ka pyniasoh lang ia ki kam digital bad ki kam ba leh hi da ki briew ban saindur ia ka lawei jong ka kam pynbyrngia. Da ka rukom treikam kaba thymmai jong ka, ka WAVES Bazaar kam dei tang ka rynsan—ka dei ka jingïaid sha ka kam pynbyrngia kaba kham stad, kaba kham ïadei, bad kaba kynthup ïa ka kam pynbyrngia kylleng ka pyrthei.
Kum ki nongsaindur, ngi wad beit ia ki jaka kiba tynjuh ia ngi, kiba ai mynsiem ia ngi, bad kiba pynbor ia ngi ban pyrkhat palat ia kaba la ju leh. Ka WAVES ka pyrshang ban long kum kata ka jaka—ka jingïaid lynti kaba pynshlur ïa ka jingïatreilang ha ki ktien, ki kolshor, bad ki lad ki lynti. Nga sngew sarong ban long shi bynta jong kane ka jingiaid lynti kaba don jingthmu, bad nga khmih lynti ban ïohi kumno ka WAVES kan batai biang ïa ka rukom ba ngi pynïasoh, thaw, bad rakhe ïa ki khana—ym tang ha India, hynrei ha kylleng ka pyrthei. Nga ngeit ba ngi sakhi ïa ka por Lagaan jong ka India ha ka kam Media bad kam pynbyrngia—ka por jong ka jingïatylli, ka jingshlur, bad ka jingïohi jngai ka ban sawa shabar ki pud jong ngi. To ngin iawan lang ban pyrkhat, ban iasam, bad ban tei ia ka lawei ha kaba kawei pa kawei ka sur ka don ka lad ban iohsngew.