Shillong: Ki shipai ka India kila pyllong ia ka jingkilanmet bha ialade bad ki tiar ki tar ialeh shi bynta ban pynkhreh lada jia ba wan ka jingiapyni bor pyrshah bad ka Pakistan.
Kane ka dei hadien ba ki lehnoh ka Pakistan kila synreit kuli pathar ha Pahalgam ha Jammu bad Kashmir ha kaba 26 ngut ki nongleitkai kila iap hashen.
Ka India ka la pynkilanmet ia ki jet iapom, ki lieng iapom bad kumjuh ia ki pilot nalor ki bor shipai. Shwa ia kane, ka India ka la phah mih noh ia ki briew kiba dei na Pakistan shwa ka 1 tarik u Jymmang 2025, bad pynkut ruh ia ka jingiateh halor ka wah Indus Treaty. Ka India ka la beh noh ruh ia ki diplomat ka Pakistan na New Delhi. Halor kane, na ka liang ka Pakistan ruh ka la shim ia ka sienjam da kaba beh noh ia ki briew na India kiba don ha Pakistan bad kumjuh ia ki Diplomat ka India. Ka la pynkut ruh ia ka Shimla Agreement kabala iateh ka India bad ka Pakistan ha ka por ba long myntri rangbah ka Indira Gandhi.
Kumba ka paw ki dak ki shin, ka jingiapyni ka lah ban jia ha kano kano ka por. Na ka liang u Prime Minister ka India u Narendra Modi ula byrthen ba ka India kan wad haduh ba kut ka sla khyndew ban da shem ia kito ki lehnoh kiba la shim ia ka jingim kiba lui lui.
Kilanmet ki shipai ki swar ka India da ki lieng, liengsuin iapom
