Shillong: U myntri ka tnad PHE ka jylla u Marcuise N Marak ula ong ba ka PHE ka iakynduh mawsiang ha ki katto katne ki bynta ban pyndep ia ka skhim sam um haduh tyngkong iing ne ka Jaal Jeevan Mission (JJM) namar ba don ki kontraktor kiba la shu ieh noh shiteng lynti haba kim sngew ioh nong na ka ka jingtrei.
Namar kane ka daw, ka shim por ban pyndep namar ba ka sorkar ka hap ban ai biang ia ka kam ha kiwei pat ki kontraktor.
“Ia ka jingtrei kaba la dep la aiti sha ki bor shnong ba kin peit kin sumar hynrei ki don ki bym treh, ka PHE ka hap shim jingkitkhlieh bad ka hap ban pynbeit ia kane da kaba pynsngewthuh ia ki bor shnong. Ki don ruh ki jingtrei kiba shim por slem ban pyndep namar ba ki don ki kontraktor ki ieh shiteng por, namar ba ki sngew bym ioh nong bad ka tnad ka hap ban khot tender biang bad kane ka la wanrah ia ka jingeh bad ka jingslem ban pyndep”, la ong u myntri ka PHE.
Katkum ka jingong u myntri, kawei pat ka daw ka dei namar ba don ki shnong kim shym la shimti ban peit ban sumar ia kane ka JJM hadien ba la pyndep ia ka jingshna bad ka PHE ka hap ban shim ia ka jingkitkhlieh ban pynsngewthuh sha ki bor shnong halor kane.
Haba kren mynta ka sngi, u myntri ula ong ba ha ka jingshisha, ka jingshna ia kane ka skhim la bun ba la lah ban pyndep ha ka jylla.
Don ki khep ba ka JJM ka sahteng ba ieh ki kontraktor haba kim sngew ioh nong
