Shillong: Ka skhim sam sum ia ka sor Shillong kaba la iaid mynta palat phew snem ka dang sahteng shi sahteng na ka por sha ka por. Kane ka la long ka daw jong ka jingktha khlieh ia ka tnad PHE kaba peit kaba pyntrei ia kane ka skhim.
Haba kren mynta ka sngi, u myntri ka tnad PHE u Marcuise N Marak ula ong ba ka jingsahteng ka skhim sam sum ia ka sor Shillong, ka Greater Shillong Water Supply Scheme (GSWSS)-III ka dei na ka jingmih bun ki jyrwit jyrwat hapdeng ka jingpyntrei.
“Ka daw ba nyngkong ka dei ka jingduna pisa kaba la mang ban pyllut ia kane ka skhim, ha kaba ka sorkar ka hap ban wad pisa biang, hadien kane ka mih sa ka jingiatyngkhuh ha kaba iadei bad ka jingpyniaid ia ki pipe ha surok ka PWD, na tnad Forest, na ka Cantonment bad kiwei ki daw”, u la ong.
U la ong ba kawei ruh ka jingeh ka dei namar ba ka nongbah Shillong kam pat dei kaba la plan ha kaba kam don ki thliew na duct ban pyniaid ia ki pipe um, ki waiar bad kane ka la wanrah ka jingthut namar ba hap ban khlong ia ka surok ia ka khyndew.
“Teng teng tang ban tih ia ka khyndew ban pyniaid ia u pipe um ka shim por namar ba hap ioh jingbit shwa na ki trai bri ne na ki tnad sorkar lada ka dei ia ka surok”, u la ong.
Sahteng sah ka skhim sam sum ia ka sor Shillong ba bun eh ki jyrwit jyrwat
