Shillong: Ka iing trep kaba la shna ban buh khunlung katba ki longkmie ki dang trei ha lyngkha ha shnong Lawshlem ka la don shi snem eiei mynta.
Ia kane ka ïing trep, kaba ai kyrteng, Ka Trep I Mei, la shna hi ki longkmie kane ka shnong kiba dei ki dkhot jong ka Iatreilang Village Organization, Lawshlem, ryngkat ka jingai jingmut ka Iarailang Cluster Level Federation (CLF). Kane ka trep la shna ban pynshong, ban buh ia ki khunlung katba ki kmie ki dang dem khui ialade ban trei ha lyngkha. Ka shnong Lawshlem ka hap ha Mawphlang C&RD Block, East Khasi Hills.
Hadien shi snem eiei mynta, kane ka Village Organisation ka la lah ban shna sa ar tylli ka Trep I Mei – Breast Feeding cum Day Care centre ha shnong – Lawshlem kiba kham pajih na kawei ka jaka sha kawei pat khnang ba kito ki longkmie kiba leit rep lyngkha sha kiwei ki jaka kin ioh ban buh ia ki khun jongki.
Ia kane ka trep kaba shna da ka dur iing Khasi, la tap bad ker da u traw, phlang ryngkat ka jaka thiah kawei, ka jaka shong hapoh, ha kaba ki kmie ki wanrah ia ki khun rit ha katei ka jaka ban peit kiba la kham san bad ialade ki leit trei ha lyngkha.
U nongthoh khubor ula ioh ban hiar sha kane ka shnong, ban iakren kham bniah bad ki nongialam ka SHG ryngkat ki nongkitkam ka Iarailang Cluster Level Federation kaba khmih ia ki shnong hapoh ka Mawphlang Cluster bad kumjuh na ka Iatreilang Village Organisation Lawshlem.
Ia kine la peit da ka Meghalaya State Rural Livelihood Society (MSRLS), Mawphlang C&RD Block.
Ka kong Sarakordor Rynjah na ka Iarailang CLF Mawphlang, ka la ong ba la pynwan dur ia kane ka kam na ka bynta ban iarap ia ki longkmie ba kin ioh ban ai buin khun ha ka por ba ki dang leit trei ha lyngkha, ban lait na u slap ka lyer. Lyngba kane ka trep, ka la iarap shisha ia ki longkmie wat ka dei ha ka jingpyrshang kaba rit ruh.
Katba ka kong Nosalyne Khyriem kaba dei peit ia ka jingkoit jingkhiah ki khunlung bad ki longkmie, ka la ong ba ka jingdon kane ka trep ka la iarap ia ki longkmie ban lait na ka jingbym biang ka por ban ai bam ia ki khun bad ka la donruh ka jingkylla ha ka jingkoit jingkhiah jongki longkmie bad ki khunlung.
Ha kajuh ka por, ka secretary ka Iatreilang Village Organization, Lawshlem, ka kong Twissida Khyriem ka la iathuh ba ka Village Organisation ka la ioh ban shna sa ar tylli ki trep ban buh khunlung sha ki jaka ba kham pajih na kaba la don mynta, namar ba tang kane ka kawei kam pat lah ban ai ka jingshakri kaba pura ia kiwei pat namar ba ha kane ka trep, lah ban buh tang 6 ngut eiei ki khunlung. Ka la ong ba na ka liang ka VO ka kwah lada ioh ka jingiarap ban shna sa ki jaka ialehkai, ka jaka shong kaba kham heh khnang ba ka trep kan ai ia ka jingshakri kaba kham paka shuh ia ki khunlung bad khamtam ia ki longkmie.
Ha kajuh ka por, u Rangbah Shnong u bah Tisharland Nongbri ula ai jingiaroh ia kane ka VO kaba la trei borbah khlem kano kano ka jingkhohnioh. U la ong ba lada long, ka shnong ka kwah ba kane ka trep kan long ruh kum ka jingkhring ia ki nongwankai khnang ban kyntiew ia ka ioh ka kot jong ki nongshong shnong.
Khlem pep, lah ban ong ba kum kane ka trep kaba la shna na ka bynta kane ka jingthmu, ka dei kaba nyngkong tam ha India bad ka lah ban khring ia ki nongwankai ruh namar ba katei ka jaka ka don shibun ki lum ki wah kiba itynnad, ban iaid lyngba sha Lyngiong, bad Mawphlang kiba dei lypa ki jaka jngohkai kiba la pawnam.
Mih sa ar tylli ka ïing Trep I Mei ban ri bad ai buin khunlung ha Lawshlem
