Shillong: Ka jingialang ka tnad pule puthi mynta ka sngi, ka la rai ban pynjlan por biang sha ka 15 tarik Jymmang ban wan, khnang ba ki bor pyniaid skul SSA kin pyrkhat janai shwa ban ai ka jingmynjur ban aiti pyniaid noh ia ki skul ha ka sorkar.
Haba pyntip halor kane, u Director ka tnad pule puthi u bah Banteilang Kharshandi u la ong ba namar ba ki nongpyniaid skul SSA ki dang sngew artatien bad kila buh shibun ki jingkylli halor kane ka jingthmu ka sorkar, ka jingialang ka la rai ban pynjlan por shuh.
U la ong ba kito ki skul SSA kiba pyniaid ki riew shimet, bad ki kynhun niam, ki hap ban ai da ka jingthoh sha ka sorkar ba ki mynjur ban aiti noh sha ka sorkar ban pyniaid ia ki skul.
Ha kajuh ka por, u la ong ba ka jingialang ka la iathir ruh halor ki skul kiba duna khynnah bad ki don ruh kiba duna nonghikai bad la ai jingmut ba ha ki skul kiba duna ki khynnah yn phah noh ia ki nonghikai sha ka skul kiba bun ki khynnah.
Hynrei halor kane, la aiti ha ki SDSEOs bad DSEOs ban peit ia kane bad ban phah ia ka kaiphod sha ka sorkar.
U la ong ba ka sorkar India kala kwah ban pynbeit ia ka rukom treikam ka tnad pule puthi ha kaba iadei bad ki skul namar ba ki don shibun ki kyrdan skul ha ka jylla.
Pynjlan por sha u Jymmang ban ai jingmynjur ki skul SSA ban shimti ka sorkar
