Wahkhen: Ha ka 19 tarik Iaiong, 2025, ka Tourism Promoters Trekking Society (TPTS) Wahkhen ka la ioh ban plie ia ka jingkieng doi doi bad ia ka jingkieng siej ne bamboo trek sha u Mawryngkhang.
U Sordar ka Raid Wahkhen u bah Jansing M Tynsong ula plie ia ka jingkieng doi doi ha wah ri ne wahrew katba ki tymmen shnong kynthup bah Shalankupar Khongwet, bah Kiewheh Tynsong bad bah Snapia Tynsong kila plie ia ka jingkieng siej ha tyrpa wah thlen, ka lynti ban leit sha u Mawryngkhang.
Ia kine ki jingkieng la shna bad la pynlut hi ka Society nadong shadong kaba la kot da ki lak tyngka.
Ha kane ka sngi, nalor u President ka Society u Babu Kular Khongjirem, la don lang u Vic President u bah Minon Khonglien, u Secretary bah Dmuising Khongjirem, u Treasurer babu Snar S Malngiang, u Asst Secretary bah Promeyo Khongjirem, ki Executive Member bad kiwei.
Nalor kine, u sordar ula plie ruh ia u maw sah kyrteng jong ki nongprat lynti ia kane ka Society kaban phaikhmat sha ka kam jngohkai pyrthei ha ka shnong Wahkhen.
Kane ka jingkieng doi doi ka long kaba donkam bha ia ki nongshong shnong ban leit trei leit ktah bad khamtam ia ki nongwankai ban kam sha shiliang khamtam ha ka por lyiur ba heh ka wah.
Ka jingplie ia kane ka jingkieng kan pynsuk ia ki nongwankai ha ka leit ka wan bad ka khring shuh shuh sha kane ka jaka jngohkai kaba la pawnam ha kine ki sngi.
Na ka liang u Sordar bad ki Tymmen Shnong kila ai ka jingkyrkhuh ia ka Society kaba la lah ban pyntyllun ia kane ka kam bad ki kitbok ba kan nang heh nang roi khnang ba kan long ruh ka jingiarap ia ki nongshong shnong ha ka kamai kajih.
Plie u Sordar ka Raid Wahkhen ia ka jingkieng doi doi, ki tymmen shnong ia ka jingkieng siej sha u Mawryngkhang
