Shillong: Ka surok ha Iewmawlong kaba pyndonkam ki briew da ki lak ngut man ka sngi, kam iahap dur ban ong ba ka dei hapdeng sor bad ha ka iew kaba heh tam ha ka jylla.
Kane ka surok kam ju don kano kano ka jingkylla dur ne ban don kiba pynbha ia ka. Ka Iewduh ka Iewmawlong ka dei hapoh ka jingpeit ka Hima Mylliem.
Nalor ka jingkhapngiah na ka jingshlei ki nongdie madan, ki kali ba iaid bad ieng, ka dei ruh kaba bunkam bha namar da ki phew hajar ki briew ki iaid ki ieng man ka sngi. Nalor ka jingjot bad tuid umpohliew tang shu slap, ka rah lang ruh ia ki synrum ki jakhlia jakhlaid ryngkat ka jingsma.
Ki paip um ruh kila shu paw bad pyniaid ha lynti iaid ki briew bad kali kaba long ka jingma shibun.
Mynta ka don ka jingpynkhreh ban pynthymmai ia kane ka iew bad dang shen, ka North Eastern Council (NEC) kala mang T. 10 klur ia kane ka iew. La iohi ba ka don ka jingsdang siang maw ha ki lynti shapoh iew la katto katne por.
Ka jingsniew ka surok ha Iewmawlong ka wanrah ka jingeh ia ki nongiaid nongieng nalor ba ka lynti iaid ruh la pyndonkam ki nongdie madan. Lada ka Hima ka don jingmih, lada ka sorkar ka ioh khajna na ki kam khaïi pateng, balei kim iohi ban pynbha ia kane ka jingdonkam jong u paidbah.
Lada dei ba iaid ki heh ki haiñ man ka por, ym tharai ba kane ka surok kan sniew sah kumne. Ha ka jingshisha, kane ka iew ka dei kaba pynmih lak pynmih klur bad kaba pynriew spah bad ai kam ai jam ia ki paidbah kylleng wat kiba nabar ruh.
Kane ka jaka ka dei ka ktem ka leit ka wan ki briew na nongkyndong haba ki wan iew wan ophis ne kino kino ki kam sha sor Shillong.
Imat ym ju kham iaid ki heh ki haiñ-Ka surok ha Iewmawlong bad ka ktieh
