Shillong: Ka kynhun ki MLA jong ka iing dorbar ka jylla, ka Committee on Empowerment of Women hapoh ka jingialam ka Chairperson ka kong Santa Mary Shylla, MLA, ka la leit jngoh ia ka longing ha Langtor, Eastern West Khasi Hills, kaba la shah pyniap ka kmie bad I khun ba dang ar bnai ha ki bnai ba la dep.
Kane ka jingleit jngoh ka long ban pynpaw ia ka jingsngew lem sha kiba haiing hasem jong ka longkmie (late) Darisha Lyngdoh bad I khun jongka ba ar bnai kiba la shah pyniap dusmon.
Lah ban kdew ba kane ka jingjia ka dei kaba sngewsih bad shyrkhei ia ka kong Darisha Lyngdoh bad I khun jongka, bad ia lap ia ka met jongki na ka tyllong ba ring rum ha shnong Langtor kaba sam sha shnong Kynshi ha ka 2 tarik Lber mynshem bnai hadien ba kila jah ha ka 1 tarik Lber.
Ha kane ka jingleit jngoh ba la ialam ka kong Santa bad ki MLA ba kynthup ia bah Matthew Beyondstar Kurbah, MLA, bah Adelbert Nongrum, MLA bad bah Brightstarwell Marbaniang MLA, kila kynduh ia ka Deputy Commissioner ka Eastern West Khasi Hills District, ka kong Anita Kharpor, Additional Superintendent of Police, bah Pyrkhatlang Suchiang bad u Sordar ka Langtor nalor ki nongshong shnong.
La pyllong ruh ia ka jingsngap jar kaba ar minit kum ka jingsngew lem ia ki mynsiem ba la khlad.
Ka Committee ka la pynthikna ban buddien ba ka jingbishar hok na ka bynta ki mynsiem ba la khlad bad ia ki hok jong ki longkmie bad ki khynnah bad ban kyrshan ia ka longing ba kynduh ia kane ka apot.
Leit jngoh ka kynhun ki MLA ia ka longing ba shah pyniap ka kmie bad I khun ha Langtor
