Shillong: Ka longkmie ka la khlad noh hashen katba u nongniah ka scooty ula mynsaw jur hadien ba la shah syllad ha kawei ka trok bym tip satia, kaba la phet krad bak mar syllad.
Kane ka la jia mynta ka sngi 13 tarik Iaiong, 2025 ha ka por 4 baje eiei janmiet ha surok Shillong By-pass ha shnong Umroi, ha kawei ka longkmie kaba la tip kum ka Kong Sidora Langstieh ka la khlad noh hashen bad u rangbah uba la tip kum u Rai Singh Laloo, u la mynsaw jur katba ki dang wan na Umroi Umdohbyrthih ban leit sha Umroi Nongrah.
Katei ka Scooty kaba la shah tynrah ka don ia u number ML 05-AA-9898 bad la iathuh ba ka la shah tynrah kynsan nadien ha kawei ka Trok kaba la pynher sted bha bad phet krad khlem ioh ban bat ia ka.
Ki Pulit na Khapmara PIC ki la hiar mardor sha katei ka jaka ban pynlong ïa ka jingothkit bad la rah noh mardor ia uba mynsaw sha CHC Bhoirymbong, na bynta ban ioh ia ka jingsumar.
La iathuh ba ki pulit ka Khapmara PIC bad Umïam Police Station ki la thwet ïa katei ka Trok bad ki la pyntip ia ki Pulit sha Mawryngkneng bad Mawlasnai.
Phet krad ka trok mar ia syllad, khlad ka longkmie ha Umroi
