Shillong: Kum ka dak ka jingai mynsiem bad ha kajuh ka por ka jingsngew sarong, ka Ïewrynghep Secondary School, Mawnianglah ka la pynkup burom ïa u heprit Edelbert Dkhar uban sa leit ban shah hikai pyntbit ha ka jingïalehkai football ha Kerala.
Ïa u heprit Edelbert la pynkup burom ha ka sngi Thohdieng ka 11 tarik Ïaïong 2025 kaba dei ruh ka sngi pynhap pyrda jong ka skul Ïewrynghep ïa ka 11th Annual Sports Meet 2025 kaba la pynlong ha madan ïalehkai jong ka shnong Mawnianglah, Upper Shillong.
Ïa u heprit Edelbert ba la synranlang da ka kmie, la pynkup burom da ka momento ïa kaba la aiti da u Bah Raymond Kurkalang, Circle Inspector, Mawngap PS uba dei u Special Guest ha ka jingsakhi lang ki nonghikai, u Rangbah Shnong bad ki khynnah skul.
U heprit Edelbert Dkhar ba dang 11 snem ka rta uba pule ïa ka class 7 ha Ïewrynghep Secondary School u la shah jied ha ka Don Bosco Football Academy, Kerala na ka trial kaba la pynlong ha Mawreng, bad un sa mih na la kajong ka Jylla ha u Jymmang mynta hi u snem.
Na ka liang ka iing ka sem ki la pynpaw ka jingsngewkmen halor ka jingshah jied u heprit Edelbert ban shah hikai pyntbit sha Kerala, da kaba pynpaw ka jingai khublei ïa ki nonghikai kiba la plie lad plie lynti ïa u ban poi sha kane ka thong. Na ka liang ka skul ruh ka la kyrkhu kyrdoh ïa u heprit Edelbert da ki kyntien sneng ki kyntien kraw ban long barobor u khynnah uba tip sngi.