Shillong: Shi bynta ban iohi ban sngewthuh bad ban lap ia ka jingeh ba ki paidbah ki iakynduh, ha ka sngi ka 9 tarik Iaiong, 2025, u myntri rangbah ka jylla u Conrad K Sangma ula leit ban iakynduh bad iasyllok markhmat bad ki nongshong shnong ka shnong Jatah bad Syntung kiba hap ha Mawkynrew Block, East Khasi Hills.
U Myntri Rangbah ula iasyllok bad sngap ia ka jingpynsngew jong ki dkhot ka Jatah Nonglyer Integrated Village Cooperative Society (IVCS) bad ki dkhot ki Self Help Groups (SHGs), haba ula ioh sngew ia ka jingeh bad ki jingjop ha ki lynti iaid jongki khamtam ban pyniaid iew ia ki mar.
Ha shnong Syntung ula iakynduh bad sngap ia ki jingeh jong ka nonghikai, ki khynnah skul, ka Sub Centre bad ki nongrep.
U la noh synniang ruh T.5 lak sha ka kynhun tem na Syntung ban thied tiar tem thymmai.
U la leit jngoh ruh ia ka kper sohshang ne strawberry bad iasyllok bad ki 115 ngut ki nongrep ia une u mar rep, kaba pynmih ia u sohshang ba bha tam ha ka ri.
Ula noh synniang ruh T. 5 lak ban shna ia ka ophis ki SHG ha kane ka shnong.
Kham hadien ula leit jngoh ruh ia ka Syntung Sub-Center bad kylli na ki nongtrei ia kano kano ka jingduna bad ka jingdonkam khnang ba leh ia kaba donkam.
Ula leit jurip ruh ia ka madan phutbol ha Syntung bad ia ka Syntung Upper Primary School kaba 151 ngut ki khynnah bad 8 ngut ki nonghikai skul. Ula iakren bad ki khynnah bad ula pynbna ban ai T.3 lak na ka Chief Minister’s Special Development Fund (CMSDF) ban thied tiar tem.
Kynduh u Myntri Rangbah markhmat bad ki nongshong shnong ka Jatah, bad Syntung
