Shillong: Ka Boxing Association of East Khasi Hills District (BAEKHD) ka la iohrah ia ka Namlahduh kum ka kynhun ia ka rynsan iakhun jong ka Mawshbuit Invitational Boxing Competition 2025 ba la pyniaid da ka Mawshbuit Boxing Club (MBC) ryngkat ka jingïatrei lang bad ka Boxing Association of East Khasi Hills District (BAEKHD), kaba la long ha Dong Nongpdeng, Mawshbuit haka 4 bad ka 5 tarik u Iaiong, 2025.
Ka BAEKHD ka la iohrah da kaba ioh khur 25 tylli ki takma baroh, bakynthup ia ka 9 tylli ki takma ksiar, 4 tylli ki takma rupa bad 12 tylli ki takma rnong.
Katba ka Mawshbuit Boxing Club ka la wan baar da kaba ioh khur 17 baroh, kynthup ia 4 tylli ki takma ksiar, 7 ki rupa bad 6 ki takma rnong. Ka Upper Shillong Boxing Association ka la wan balai, mar 4 ki takma ksiar bad takma rupa bad kawei kawei ka takma rnong, baroh 9 tylli ki takma ka la ioh khur.
Ka Green Heart Boxing Club ka la pynkut ha ka kyrdan basaw da 11 tylli baroh, kynthup ia 3 tylli ki takma ksiar, 4 ki rupa bad 4 ki rnong bad ka Rising Star Boxing Association ka la pynkut da 10 tylli ki takma, kynthup ia 3 tylli ki takma ksiar, 4 ki rupa bad 3 ki takma rnong.
Ia ka khusnam Best Boxer jong ki shynrang la ioh khur da u Leo Fernando Nongkhlaw (MBC) bad na ki kynthei ia ka nam Best Boxer la ioh da ka Sophia Suchiang (MBC).
Ha kane ka rynsan iakhun ki la don baroh 72 ngut, 56 ki shynrang bad 16 ki kynthei.
Ha kane ka rynsan iakhun boxing la poi sakhi lang da u MLA Mawryngkneng u bah Heavingstone Kharpran kum u kongsan ba la synrang lang da u MDC Sohryngkham u bah Bill Clinton Wankhar, ha ka jingdon ryngkat u bah Larry kharpran, Joint Secretary ka Boxing Federation of India bad u Technical Director jong ka Meghalaya Boxing India bad kiwei kiwei.
Ïa kane ka jingïakob, la pynlong ryngkat ka jingïarap na ka District Sports Promotion Society bad ia kine ki jingïakob la pynlong ha ka kyrdan ïakhun ki Sub Junior, Junior bad Senior kynthei bad shynrang.
25 tylli ki takma, khur ka BAEKHD na ka lympung Mawshbuit
