Shillong: U Member secretary ka Meghalaya State Pollution Control Board (MSPCB) u Dr. George Chyrmang ula ong ba teng teng sngew synei ia ki karkhana kiba hap sha Meghalaya ba hap ban ñoin ba kin bud pyrkhing ia ki kyndon ban tehlakam ia ka jingjaboh ha Byrnihat katba ki karkhana na Assam pat kim leh eiei.
Haba kren mynta ka sngi, u Dr. George ula ong ba ka jingjaboh ka Byrnihat kam dei tang na Meghalaya hynrei ka dei na Assam ruh. Ula ong ba ka MSPCB kala thoh sha ka Assam ban don ka jingiatreilang ban tehlakam ia ka jingjaboh ka Byrnihat kaba la paw kum ka jaka kaba jaboh tam ha baroh ka pyrthei, hynrei haduh mynta khlem ioh kano kano ka jubab na ka Assam.
“Teng teng ngi long kumba leh bein ia ki karkhana jong ngi namar ia ki jong lajong, ngi sympat ngi dain kuna hynrei shatai shiliang pat ka pum ka iaid beit”, la ong u bah George.
U la ong ba ka data kaba pynbud nam ia ka Byrnihat kum ka jaka kaba jaboh tam ha pyrthei, ka dei kaba shim na Assam hynrei ym kwah ban kynthoh ia ka Assam ne ia ka Meghalaya namar ba ka dei ka khappud. U la ong ba ka don ka kaiphod kaban sa pyllait shen ba leh da ka NERI (National Engineering Research Institute) ha kaba ka jingjaboh kam dei tang na ki karkhana hynrei ka dei na ki pum pum na surok, na ki karkhana, ki kali, ka jingthang khlaw. Mynta ka Assam ka la sdang ban shim khia lang hadien ba la shim khia u Myntri Rangbah u Conrad K Sangma bad lada iatreilang baroh ar kan long kaba sngew tynnad ban tehlakam ia kane ka jingeh.
Ula ong ba ka Meghalaya ka la dep thoh bad ka kwah ban tuklar noh ka Central Pollution Control Board ka sorkar India khnang ba kan tan ia baroh ar kata ka Meghalaya bad ka Assam ban tehlakam ia ka jingjaboh ka Byrnihat.
Teng teng synei ia ki karkhana na Meghalaya ha Byrnihat ba shah sympat, katba na Assam kam leh eiei
