Shillong: Ka Skul Mawpdai Area Secondary School, Mawpdai kaba don ha ki thaiñ khappud India bad Bangladesh kaba hap ha Mawsynram Constituency East Khasi Hills District, ka la pynkyndit ïa ka result Secondary School Leaving Certificate ne kaba la tip ka Matrik mynta u snem 2025 ha kaba u samla Manderson Thongni u la pass bha bad poi sha ka Top20 da kaba ïoh 95 percent. Ym tang katta, ka Mawpdai Area Secondary School ka la ïoh ruh ban kheit ïa u soh bathiang ha kaba baroh 13 ngut kiba ïaleh ïa ka eksam ym tang ba ki shu pass hynrei ki wan ha ba nyngkong da kaba ïoh 80 percent shaneng
Ha ka jingpynbna ka Meghalaya Board of School Education (MBoSE) ïa ka result SSLC ha ka sngi Saitjaiñ ka 5 tarik Ïaïong 2025, u samla Manderson Thongni uba dei u khun jong u Bah Commander Shangpliang bad ka Kong Dashisha Thongni ba shong ba sah ha ka shnong Jyllep, u wan ha ka kyrdan ba san ryngkat ki saw ngut ha ka Top20 da kaba ïoh 570 Mark. U samla Manderson Thongni u ïoh distinction ha ar tylli ki subject ha ka subject Science bad Health Education.
Na ka liang u samla Manderson Thongni u la pynpaw ka jingsngew nguh ïa U Blei uba la don ryngkat ha kane ka jingïaid lynti, ïa ki nonghikai kiba la ai ki jinghikai, ïa kiba haïing hasem kiba la ai mynsiem bad ïa ki kmie ki kpa kiba la kyrshan skul ban pynnang pynstad.
Katkum ka jingïathuh ka Principal jong kane ka skul ka Kong Aistora Lyngdoh Mawlong ka la ong ba ki la don baroh 13 ngut kiba ïakhun ia ka eksam matrik bad baroh ki la pass lut da kaba wan ha ka kyrdan ba nyngkong kynthup u samla Manderson Thongni uba poi sha ka top20. Ka la ïathuh ruh ba kane kadei ka sien kaba nyngkong ba ka skul kan poi sha ka top20 bad ruh ka sien kaba nyngkong ban pass lut baroh ki khynnah.
Ka la pynpaw ka jingsngew nguh ïa U Blei, ka jingai khublei ïa ki nonghikai bad ki kmie ki kpa kiba la ïatreilang ha kane ka jingjop jong ka skul.