Shillong: Ka tnad Food and Safety ka jylla ka la lap kyndit ia ki jingbam kiba la kut por na kawei ka dukan ha ha Laban mynta ka sngi.
Ia kane ka jinglap ia kine ki jingbam ba la kut por, la lap ha ka jingjurip kynsan na ka dukan kaba kyrteng ka All Market kaba don ha Rowell Road Laban.
Ka Commissioner ka Food Safety ka kong DBS Mukhim ka la ong ba ka tnad kan pynshitom ia u trai kane ka dukan da kaba dain kuna halor kane ka jingjia. Ka kuna kam duna ia ka 2 lak tyngka ia kiba pynkhein ia ka ain.
Ka la ong ba kane ka dei ka jingjurip kaba ju leh man ka por sha kylleng ki dukan ha ka nongbah bad ha kiwei ki jaka.
Ka la ong ba ka tnad ym tang ba ka pynshitom ia kiba pynkhein ia ka ain hynrei ka ju ai ruh ia ka jingpynshai, ka pynsngewthuh ba kiba die ia ki jingbam, ki dei ban leh khuid, ban long kiba lait na kano kano ka jingma ia ka jingkoit jingkhiah jong ki briew. Ka la maham ba ki nongdie dukan kim dei ban die pathar khlem da peit ia ki marbam kiba la kut por bad kim dei ban iakhleh ia ki jingdie kiba long ban bam bad ki bym dei ban bam.
Lap ka tnad Food & Safety ba die ka dukan ia ki jingbam ba la kut por ha Rowell Road Laban
