Na ki 6 hajar tam sa kumba 17 spah tylli ki shnong bym pat poi surok

Shillong: Na ki 6000 tam ki shnong ha ka jylla Meghalaya, ki dang don sa 1700 tam eiei ki bym pat poi surok.
Ka sorkar jylla ka la buh thong ban pynpoi surok lut ia kine ki shnong bym pat poi surok ha u snem 2032. Kumba long haduh mynta, donbok ba ka jingioh surok ki shnong sha nongkyndong, ka dei na ka skhim ka sorkar pdeng ka PMGSY hynrei lada dei ba kin ap ia ka surok na ka sorkar jylla kan long kaba slem ba kin ioh surok na ka jinghiran pisa.
Dang shen ha ka jingkren ha ka mang tyngka, u myntri rangbah ka jylla u Conrad K Sangma ula buh thong ba ia kine ki shnong yn pyniasoh da ka surok lyngba ka Chief Minister’s Rural Connectivity Programme bad tang ha u snem ban wan, ula buh thong ban pynpoi surok noh sha ki 100 tylli ki shnong hapoh kane ka skhim.