Shillong: U Myntri ka tnad ri jingri ka jylla u bah AL Hek u la ong ba ka long kaba eh ban khang ia ka kam khaïi ki briew khamtam ia ki masi kum sha Bangladesh.
Ha ka jingshisha, ki shipai BSF kila leh ia ka bynta ba kongsan ban tehlakam ia kane bad kila ioh kem ruh ha ki jaka ha Jaintia Hills bad ha East Khasi Hills ia ki masi kiba la thmu ban shalan shabar sha Bangladesh.
Haba kyllli, balei ka iai jia beit ka jingshalan masi sha Bangladesh wat hapeng ka jingpyrkhing ki shipai, u bah Hek u la ong, “Mano ba lah ban khang ia ka kam khaïi ki briew, iathuh ia nga, ki leh ia ki kam khaïi jongki”.
U la ong ba ka jingshalan beain ia ki masi sha Bangladesh ka ktah ia ki briew pat ha kane ka jylla, kaba lah ban kiew dor ka doh masi bad na kane ka daw, ki BSF bad ki pulit ki long kiba peitngor bad phikir ban khang lad ia kane ka kam shalan beain ia ki masi sha Bangladesh.
Lah ban kdew ba jan man ka sngi, ki BSF kila ju ioh kurup ia ki masi bad ioh bat ia ki briew kiba shalan masi beain sha Bangladesh hynrei ym shym la sangeh kane ka kam, namar ba ka lah ban wanrah ia ka jingioh nong ia ki nongkhaïi na ka jingjur ka jingdawa masi sha katei ka ri.
Ka eh ban khang haba khaïi ki briew ia ki masi, ong u bah Hek
