Shillong: U Superintendent of Police (SP) u bah Vivek Syiem ula ong ba ki paidbah ki dei ban pyntip sha ki pulit ha u number 112 haba ki lap ne iohi ia kano kano ka jingjia kum ia kiba dih drok ne ka jingpluh ding ne kano kano ka jingjia.
Haba kren mynta sha ki lad pathai khubor, u la ong ba ki pulit ki ju pahara ha ka por mynmiet ruh ban tehlakam ia ki kam sniew hynrei kam mut ba kin shong ha baroh ki jaka.
U la ong ba ki pulit ki ju talasi ruh ia ki nongniah kali, ki ar shaka kaba buh jingma ia kiwei.
Ha kaba iadei bad u drok, ka jingiakhun ka long kaba tyngeh khamtam hadien ba ka don ka Anti Narcotic Task Force (ANTF) kaba peit pura ia kane ka bynta. Hynrei kaba kongsan ka long ban don ka jingiatreilang bad ki shnong lyngba ki volunteer bad ka tnad pulit ka dang ai ka jinghikai ia kine ki volunteer ha kaba iadei bad kumno ban tehlakam ia ka jingkharoi ki nongdie bad nongdih drok.
U SP u la ong ba ka jingkharoi ki mendih drok ka la buh jingma ia ki nongleit nongwan bad bunsiem kine ki briew ki ju leit sha ki jaka ba ki pulit ki jngai bad ki briew kiba iohi ne lap ia ki, ki dei ban shu phun ha u number 112 khnang ba ki pulit kin leh ia kaba donkam.
Pyntip ha u number 112 haba lap ia kiba die ne dih drok, ong u SP
