Shillong: U MLA ka BJP uba dei ruh u myntri sorkar jylla u bah AL Hek ula ong ba ka jingkylliang ne em ia ka shuki myntri hapdeng jong u bad u bah Sanbor Shullai, ka shong ha ka rai jong ka party.
Lah ban kdew ba ha ka samoi ba la dep, ka party ka la iasam mar kylliang ia ka shuki myntri hapdeng u bah Sanbor bad u bah Hek.
Haba kren mynta ka sngi, u bah Hek ula ong ba ia ka kam ban bujli shuki myntri, la shaniah ha ka party bad lada ka bthah ia u ban hiar shuki, u hap ban kohnguh.
Ha kawei ka liang, halor ka jingkhapngiah kali ha sor Shillong, u bah Hek ula ong ba ka lynti kaba suk tam ban weng ia kane ka jingkhapngiah kali, ka long ban rah ia ka ophis sorkar kumba la pynkhreh ka sorkar sha Shillong thymmai.
Halor ka jingbym lah plie jingkhein ka BJP ha ka elekshon District Council dang shen, u bah Hek ula kam ba ha kawei ka sngi, ki paidbah ka Meghalaya kin sa sngewthuh bad pdiang ia ka jingaiti u Myntri Rangbahduh ka ri u Narendra Modi.
U la ong ba watla ka BJP kam shym la lah ban jop ha ka elekshon MDC sha ka KHADC bad ka JHADC, hynrei ha kawei ka sngi, ki paidbah kin sngewthuh ia ka jingtreikam ka BJP bad kin pdiang ha kane ka jylla.
U la ong ba ka jingbym lah ka BJP ban jop ha ka elekshon MDC, ym lah ban ong ba ki pdiang ne ki kyntait hynrei ka dei ka mon jong ki paidbah ban jied laitluid.
‘Katba ong ka party, ngi hap ban kohnguh’, ong u bah Hek lada phah hiar shuki myntri
