Shillong: Katkum ka jingsor jamin ka sorkar India, kumba 43 percent ki nongshong shnong kin sah ha sor ha u snem 2035 kynthup ha kane ka jylla Meghalaya.
Shi bynta ban pynbiang ia ki jingdonkam halor kane, ka sorkar jylla ka la pynkhreh shibun ki kam ban pyllong ia ka sor Shillong Thymmai ne ka New Shillong Town kaba paka.
U Myntri Rangbah ka jylla, u Conrad K Sangma u la ong ba ha une u snem 2025, ka sorkar jylla ka la mang T. 2000 klur ban pyntrei ia ki kam ha Umsawli kiba kynthup ia ka jingtei ia ka Secretariat, Unity Mall, ki surok, Meghalaya Skills and Innovation Hub, Prime Hub, Heliport bad ka Working Women’s Hostel.
Ka sorkar ka la pynwandur ia ka sor thymmai kaban long kaba itynnad bad kaba iaryngkat bad kiwei ki sor ha kylleng ki jaka ka ri bad ka pyrthei. Kan tei ia ka Knowledge City ha Mawkhanu, nalor kiba iadei bad ka kam jngohkai, ka jingialehkai, ka IT bad ka pule puthei.
Ym tang katta, la pynwandur ia ka Sor Thymmai kaba paka ban iaid kjat ki briew ha kaba don 20 km ka lynti iaid kjat bad ka lynti iaid saikil.
Khnang ban pyniajan bad pyniasoh ia ka Shillong Rim bad Shillong Thymmai ka sorkar ka la pynkhreh ban shna ia ki lai tylli ki surok. Ka surok na Polo sha Bellefonte, Mawpat sha Nongkohlew, Lumdiengsai sha Shillong Bypass bad sa kiwei na Mawlyngad sha Mawkasiang lyngba ka Mawshbuit bad ka Mawlynrei.
Yn kiew sor 43 percent ha u snem 2035
