Shillong: Ka sorkar jylla ka la poi sha ka jingiamynjur lang bad ki nongtrei ka karkhana ban khang noh ia ka Mawmluh Cherra Cements Limited (MCCL).
Halor kane, ka sorkar jylla ka la mang T.98.25 klur ban ai sha ki 300 ngut duna ki nongtrei ka MCCL kumba la iateh.
Shi bynta halor kane, ka sorkar ka la pyllait T.40 klur ha kane ka snem mang tyngka bad kaba sah sa T.58.25 klur yn pyllait lashem snem ban wan.
Ka sorkar ka la pynkhreh ruh ban tei noh ia ki kam kiba iadei bad ka kam jngohkai ha ka jaka kaba don ka karkhana MCCL bad ha ki sawdong ka shnong Mawmluh khnang ba kan long kum ka jingpynmih bujli ha ka jaka ka karkhana, ban ai kam ai jam bad kyntiew ia ka ioh ka kot jong ki nongshong shnong katei ka thain, kiba ju im bad kamai na ka jingdon kane ka karkhana.
Lah ban kdew ba ka sorkar ka la rai ban khang pynkhyllem noh ia ka karkhana shna dewbilat ka MCCL kaba la seng naduh ka por ba ka don ha Assam, hadien ba kam lah shuh ban pynioh nong, kaba la pynkylla dap ram ia ka sorkar da ki spah klur.
Ha ka jingshisha, ka sorkar ka la khot ia ki kompeni kiba nabar ban wan pynkhie im ia ka hynrei ym don satia kiba wan ban shimti bad haba kutlad halor kane, ka sorkar ka la rai ban pynkhyllem syndon noh ia ka.
Sah sa T.58 klur tam ban siew ka sorkar sha ki nongtrei ka MCCL
