Shillong: U nongialam ka liangpyrshah u Dr. Mukul Sangma ula ong ba kane ka dorbar mang tyngka 2025-26 ka kham biang ban ianujor bad kaba la dep.
Haba kren hadien ba la wai ka dorbar ha ka sngi Palei, u Dr. Mukul u la ong ba u la pule bniah haduh shiteng miet ruh ia ka mang tyngka ban iathir haka dorbar. U la ong ba ka jingiathir halor ki mat ka kham biang namar ba ha ka sngi ba iathir ia ka mang tyngka, kam don shuh ka Demand for Grant, khnang ban ailad kham kylluid ia ki dkhot.
“Kane ka dorbar mang tyngka ka kham biang ban ianujor bad ka dorbar mang tyngka kaba la dep namar ba ka liangpyrshah ka la ioh ban kren bun ki mat, ha kaba ia ka mat demand for grant (DfG) la wengh ha ka por ba iatai ia ka mang tyngka”, la ong u Dr. Mukul.
U la ong ba haba ki MLA ki wan sha ka dorbar, kin hap ban pynkhreh ban iathir ia ki mat bad kumjuh ki myntri sorkar ki dei ban pynbiang ia ki jubab. Ka jingialang ka Business Advisory Committee (BAC) ruh ka la iakren ia kane ba dei ban ai por kylluid ia ki dkhot ka iing dorbar ban iatai halor ki mat.
Sngew biang u Dr. Mukul ia ka jingioh iatai ha ka dorbar mang tyngka
