“Ka eh ban ïoh bainong lada khlem ka jingtrei shitom nalade hi” ong u GS ba thymmai ki nong ñiah taxi

Shillong: U General Secretary ba dang shu shah jied thymmai jong Ka Synjuk Ki Nong Ñiah Taxi (Sor bad Khapsor) u Bah Denzil Nongkynrih u la ong ba ka bainong lada khlem trei shitom nalade ka long kaba eh ban ïoh.
Ïa kane u Bah Denzil u la ong haba ai jingkren lyngkot hadien ba u la shah jied kum u general secretary ba thymmai jong ka Synjuk ha ka jingïalang pynthymnai ïa ki nongkitkam na ka bynta ka samoi treikam jong u snem 2025-28 kaba la pynlong ha ka sngi Thohdieng ka 14 tarik Lber 2025 ha Dorbar Hall Nongmensong, Shillong.
U Bah Denzil u la ong ba bunsien ka Jaidbynriew Khasi kadei kaba shu ap tang ka suk ban ïoh bainong hynrei ïa ka bainong yn ym ïoh lada khlem ka jingtrei shitom nalade hi. Une u General Secretary ba thymmai u la kyntu ruh ïa ki para dkhot ba kin ai ka jingïatreilang na ka bynta ban pyntyllun ïa ka kam jong ka Synjuk namar tang marwei hi ban treikam ka long kaba eh kumta ka donkam ka jingai jingmut lang na baroh.