Shillong: U MLA ka Nongkrem u bah Ardent Miller Basaiawmoit ula dawa ba dei ban weng noh mardor ia ka kyndon 39 jong ka ain Meghalaya State Investment and Promotion Facilitation (MIPA).
Haba shim bynta ha ka jingiatai halor kane ha iing dorbar mynta ka sngi, u MLA ka Nongkrem ula ong ba katkum kane ka ain, MIPA ka la pynjngut ia ka Meghalaya Land Transfer Act 1972.
U bah Ardent la buh jingartatien ia ka jingwan ki karkhana sha kane ka jylla kum ha Byrnihat, Lumshnong, ha Umiam, namar ba ki wan ban pynjot pynban ia ka jylla, ym ban kyntiew. Ki ktem jong ki karkhana ki kylla long ki jaka bym long shuh ban sah briew.
U la ong ba ka MIDC ha ka 7 tarik Lber 2025, ka la khot Expression of Interest (EOI) ban shim jaka ha Umsiang Ri-Bhoi kaba heh 300 akar shaneng ban buh ktem karkhana, bad ula buh jingkylli haei ka jingdonkam ka MIDC ban shim jaka haduh 300 akar. U la ong ba ka party kam pyrshah ia ka jingwan nongbei pisa hynrei kam dei ban iapein ia ka jaka jong ki briew ka jylla.
Ula kyntu ban sangeh lut ia baroh ka jingthmu ban shim jaka da kaba delete ia ka kyndon 39 jong ka ain MIPA.
Kham hadien ba la ioh ia ka jubab kaba shai na u myntri rangbah, u bah Ardent ula weng noh ia ka amendment motion halor kane bad ka iing dorbar ka la mynjur da kaba suk baroh.
Pynkut noh ia ka jingthmu ai jaka, weng ia ka kyndon 39 ka ain MIPA: Ardent
