Shillong: U myntri ka tnad pynroi nongkyndong u AT Mondal ula pyllait ia ki kyndon ba la buh ia ki briew ban ioh pdiang ia ka skhim shna iing baduk ne ka PMAY-G Housing Skhim.
Haba jubab halor ka jingkylli kaba la wanrah u MLA ka Dadenggre u Rupert Marak hapoh ka iing dorbar mynta ka sngi, u Mondal u la ong katkum kane ka skhim PMAY-G, kito kiba la don ka iing ba paka, kali, mashin rep, kiba shim ia ka Kisan Credit T.50 hajar shaneng, kiba treikam sorkar, kiba kamai 15 hajar shi bnai, kiba siew ia ka pay income tax, profession tax, kiba don ka jaka 2.5 akar ka jaka shaneng kim ym ioh shuh ia kane ka skhim.
Kito kiban ioh ia kane ka skhim ki dei kiba khlem don shynrang kiba 16-59 snem, ka iing ka bym don kiba nang ban thoh ban pule kiba la don 25 snem, kito kiba don ka jingduna dkhot met, ki bym don jaka bad kito kiba duk tasam.
Pyllait u myntri ia ki kyndon ban ioh skhim shna iing baduk
