Shillong: Ka Meghalaya Arm Wrestling Association (MAWA) ryngkat ka jingsnohkti lang bad ka Bouncer Association of Meghalaya ka la pynlong ia ka jingjied ia ki nongiashim bynta ha jingiakhun kti kaba heh tam ha ka pyrthei kaban long ha Moldova, Europe.
Ka Meghalaya Arm Wrestling Association hapoh ka jingialam jong u bah Junestar Kharbuli, ka la pynlong ia kane ka jingiakhun kti ha surok jong ka Malki Point ka long shibynta ban pynphriang ia ka jingkordor ki kam ialehkai ban lait na ki jingdih pynbuaid kum ki kiad, droks, kynja ba kiwei.
Haba kren sha ki lad pathai khubor, u bah Junestar Kharbuli u la ong ba nalor kine kiwei pat kiba ka MAWA ka la jied kan phah ia ki rang bad ki thei ialehkai khun kti sha kane ka lympung baheh bha kynthup ki katto katne ngut ki rang bad ki thei iakhunkti ba la paw bha na kane ka jylla.
Shuh shuh u la ong ba tad haduh mynta ym shym pat don kano kano ka jingiarap na ka sorkar bad kumta na ka liang la MAWA kan phah noh tang khyndiat ngut ki nonglehkai ban mihkhmat ia ka jylla bad ia ka Ri India ban leit iakhun ha kane ka rynsan kaba heh tam ha ka pyrthei ha kaba iadei bad ki jingiakhun kti ne kaba la tip kum ka Arm Wrestling.
Jied nongiakhun kti ka MAWA ban leit pyni bor sha Moldova
