SHILLONG: Ka jingthmu ka Executive Committee jong ka Khasi Hilla Autonomous District Council (KHADC) ban thaw ain ia ka kam khwai dohkha ka la sahkut noh shwa hadien ba ka sorkar jylla ka la pyndam noh ia ka jingpynbna ha ka dulir sorkar ne gazette halor ka kam khwai dohkha.
Ha ka jingshisha, ka KHADC ka la pynmih ia ka hukum dang shen ba kiba pynlong ia ka jingkhwai dohkha, kin hap ban ioh jingbit bad siew khajna haba pynlong ia ka jingiakop khwai, hynrei hadien ba la mih ka jingjia ha Pamphyrnai, kaba la ialam sha ka jingduh ei ia I khunlung na ka jingsah ka ambulance ba iathngian ki nongkhwai dohkha, ka la pynkyndit ia ka sorkar jylla, haduh ba ka la pynmih ia ka hukum ban khang shwa ban pynlong ia ka jingkhwai dohkha ha West Khasi.
U Deputy Chief Executive Member ka KHADC u bah Pynshngain N Syiem u la ong mynta ka sngi, ba ka Council ka la pynmih ia ka hukum na ka Executive Committee da kaba thmu ban wanrah jingpynkylla syndon ia ka Fishery Act hynrei hadien ba la shah pyndam noh ha ka sorkar jylla, bad mynta ka Council ka dang pynkhreh ban pynkylla noh ia ka ain halor kane.