SHILLONG: Ka Khasi Students’ Union (KSU) na East Jaintia Hills District ha ka jingiakynduh ia u Symbud Myntri Rangbah ba khmih ia ka tnat Kam Pohïing ha ka jingialam u samla KS Suchiang General Secretary East Jaiñtia Hill KSU ka la pynsngew ia Ki mat jingdawa ban pynkynriah ia ka kem BSF kaba don ha Huroi, bad kane ka jingdawa ka la neh slem bha bad ka daw ban dawa ia ka ken ki BSF ka long ba ki BSF ki long ki mawjynthut ia ki paidbah katei ka thaiñ, la pynpaw ka jinglyngngoh ba ki BSF kumno ki don ha NH, ha kaba ki la pyndik ia ki paidbah kiba iaid ba ïeng bad kiba kit mar haduh ban ktah kti ia ki kynthei khynnah.
Ha kane ka jingiakynduh na ka liang u Dy CM u la pynpaw ka jinglyngngoh bad kular ban iakren bad u SP ban phah weng noh ia katei ka kem BSF.
U bah KS. Suchiang haba kren bad ki nongthoh khubor ha Shillong Press Club hynne ka sngi, u ong ba mynta la 5-6 snem ba ka don ka krem BSF ha katei ka jaka. Dang ha kine ki snem ba la dep ki la ktah kti khlem don daw, ia u khynnah skul bad lada jia ba ym don briew lei ki lah ban pynmynsaw ia u tei u khynnah.
U la ong ruh ba ha kato ka jaka kim ap ia ka NH ki ap tang ia ka lynti ban leit sha Huroi, haba don kali passenger ki talasi kumba dei ki kali leh beaiñ bad katei ka jaka ba shong ki BSF ka dei ka jaka jong ki riew shimet la ong u bah Suchiang.
Ha kane ka u bah Suchiang u la pyntip ruh ba watlada na ka liang u Prestone Tynsong u la kular ban maramot ia kane ka surok. Hynrei na ka liang ka seng kan sa pynlong ka jingiakhih ha ka 25 tarik September 2023 da kaba kin thiah ha surok naduh ka por 10 baje mynstep haduh ka por 4/5 baje janmit.