SHILLONG: Ki nongtrei jong ka Mawmluh Cherra Cement Employee Union (MCCEU) mynta ka sngi, ki la pynsngew biang ia ki mat jingdawa sha ka sorkar ba kadei ban pyntyllun biang ia ka karkhana pynmih dewbilat ka MCCL bad kadei ban ai noh da ka Voluntary Retirement Scheme (VRS).
U President ka MCCEU u bah Shanlang Diengdoh haba kren sha ki lad pathai khubor, u la ong ba ki nongtrei hapoh kane ka kynhun ki kwah ba kane ka karkhana kan khie im bad kan tyllun biang kumba long mynshwa.
“ Ngi kyntu ia ki bor pyniaid ka MCCL bad ka sorkar ba kin pyrkhat bad ba kin shim ia ka jingkitkhlieh ba kin pynwandur thymmai biang sa shisien ia kane karkhana MCCL,” ong u bah Diengdoh.
Haba iadei bad ka VRS, u President ka MCCEU u bah Shanlang u la ong ba ka Union ka dawa na ka sorkar ba kadei ban ai noh da ka VRS khnang ba ki nongtrei barim ne kiba tymmai kin ioh ia ka hok jong ki.
U la ong ba ha u 2017 ka sorkar ka tyrwa VRS sha ki nongtrei kumba 150 ngut bad mynta ki kwah ba ka sorkar kan ai noh da ka VRS sa sha kumba 170 ne 180 ngut eiei ki nongtrei kaban kong kum ka jingiarap ia ki.
U bah Diengdoh u la ong,“Kane ka jingeh jong MCCL kadei kaba la slem bah hynrei ha ka rta jong u um pat ju iohi ba kin don ki nongmihkhmat na kane ka thain ba kin kren ia kane mat.”
Haba iadei bad ka jingthmu jong ka sorkar ban pyntreikam da ka Joint Venture, u Secretary ka Union u bah Pynskhem Lyngdoh u la ong ba la san snem ka la iaid hynrei haduh mynta ka sorkar ka dang iakren bad kam pat iaid shakhmat. “ Sa katno snem kan shim por ban iakren ia ka Joint Venture, katba ki nongtrei pat kim ioh pisa,” u la ong.
U la kyntu ia ki Myntri sorkar bad kiwei de ki nongialam na kiwei ki seng sain pyrthei ba kin iakren ia kane ka mat hapoh ka Iing Dorbar thawain jong ka jylla.
Shaei ka VRS, ka Joint Venture ia ka MCCL, kylli ki nongtrei
