SHILLONG: Ka paidbah ka shnong Nongtyngur ha ka 15tarik, nailar 2023 ki la ioh ban bat ia uwei u Khar Bangladesh uba lah wan kiew tuh sha kane ka Ri Khasi (India) da ki jingthmu ban leh ia ki kam kiba sniew.
Hadien ka jingbat ia utei u Khar Bangladesh, ka bor pyniaid shnong Nongtyngur ka la aiti noh sha ka KSU Nongtyngur Unit ban bishar bad ban leit aiti sha ki bor pulit khnang ba utei u Bangladesh un shah pynshitom da kaba tyngeh.
Ka KSU Nongtyngur Unit bad ka KSU South Central East Circle ryngkat ka jingiatreilang bad ka bor shnong Nongtyngur ki la leit aiti noh ia utei u Khar Bangladesh sha ki pulit ka Thanat Pynursla, East Khasi Hills.
Ka jingioh bat ia utei u Khar Bangladesh ka dei tang hadien ar sngi ba la shah pyniap dusmon kawei ka longkmie Khasi na ka shnong Donaskur, East Jantia Hills ha uwei u Bangladesh, uba la pyniap ia ka ha kawei ka jaka khlaw bad pharia lyngkhot lyngkhai ia ka met naduh ki kti ki ktah, bad ot ruh ia ka ryndang kaba la pynpar ñiang khriat lut ia ki paidbah kiba sah ha shilynter ki Khappud Bangladesh.
Shuh shuh ban shu pynkynmaw ba ki briew kiba sah ha shilynter ki Khappud Bangladesh ki mad na ka por sha ka por ia kiba kine ki jingshah thombor ha ki Khar Bangladesh, hynrei ki shipai BSF kim ju lah ban ai jingiada ne shimkhia ia kiba kum kitei ki jingjia hynrei ki dei pynban ki nong pynjan bha, katba ia ki trai shnong kiba dei ki Khasi bunsien ki ju pyndik pynsyier mynsiem bad leh tohmet ruh.
Katkum ka kyrwoh, ka KSU Nongtyngur Unit ka dawa ia ki bor pulit ba ka dei ban pynshitom tyngeh ia u kum kine ki Bangladesh kiba kiewtuh da ki jingthmu ban leh ki kam sniew, ym ban shu pynlait suk kumba lah leh na kawei ka por sha ka wei ka por, ong ka Kyrwoh na ka GS KSU Nongtyngur, samla Melajied Khongbuh.
Ioh bat ki paidbah ka Nongtyngur ia u khar Bangladesh ba rung tuh
