SHILLONG: Ka dorbar synrai ka ïing dorbar thaw ain ka jylla Meghalaya kaba san sngi kala sdang mynta ka sngi.
Haba sdang ka dorbar, u MLA ka Voice of the People Party (VPP) u bah Adelbert Nongrum ula wanrah da ka Motion of Amendment katkum ka Rule 231 ka ain pyniaid dorbar, ban dawa ia ka jingpynkylla ia ka rai ka Business Advisory Committee ka ïing dorbar, khnang ban pynjlan ia ki sngi ia ka dorbar namar ba ka lyngkot palat.
U MLA ka North Shillong, ula ong ba ki MLA khamtam na ka liangpyrshah kin ym lah ban kren ia ki mat kiba bun kiba ktah ia ka jylla kum ka bhah pule doktor, ka jingleh palat ki pulit, ka Them Iewmawlong, bad kiwei, na ka jingduna sngi ka dorbar.
U President ka VPP ruh u bah Ardent M Basaiawmoit ula bynrap da kaba kyrshan lang ia kane ka mat ba wanrah u bah Adelbert.
U bah Adelbert ula ong ba ka jingai tang 2 sngi ia ki MLA liangpyrshah ban rah ia ki mat kala jyndong palat, bad ula kyntu ia u Lamphang u Thomas A Sangma ban pynjlan ia ka sngi long dorbar.
Hynrei haba jubab halor kane, u Symbud Myntri Rangbah ka jylla u bah Prestone Tynsong uba peit ia ka tnad Parliamentary Affairs, ula ong ba ka Business Advisory Committee kala iatai sani ia ki sngi bad kala rai ruh ba man ka sngi long dorbar lah ban pynjlan 2 ne 3 kynta lada don ki mat ba donkam ban iathir.
Ula kyntu ia ki MLA liangpyrshah ban ym ia rah lang kijuh ki mat namar ba kan pynsyrwa kai ia ka por.
Hadien, kane u bah Adelbert ula weng noh ia kane ka motion.
Weng noh u MLA ka VPP ban dawa pynjlan sngi ia ka dorbar
