SHILLONG: Ka sorkar jylla mynta ka sngi, ka la rai ban tar noh ia ka soskular kaba la iateh bad ki kompeni kiba la aiti ban pyntrei ia ka ar tylli ki projek pynmih bording kynthup ka Kynshi- I Hydro Electric Project bad ka Upper Khri Stage I bad II project.
U myntri rangbah ka jylla u la ong ba ka jingpyndam ia kane ka soskular ka dei namar ba la shem ba kan ym long kaba ioh jingmyntoi ia ka jylla bad ka jinglut ban pyntreikam ruh ka long kaba jubor nalor ka jingpynslem jong ki kompeni ban pyntreikam ia kine ki projek kaba la iasoi ha u 2007 ia ka Kynshi Project bad ha u 2012 ia ka Khri projet.
Hynrei ha kajuh ka por, ula ong ba ka sorkar kan thaw lad ban pyntreikam ia kine ki projek da kiwei ki lynti. U la ong ruh ba ka jingpyndam ia kane ka soskular kan ym ktah eiei ne lut eiei ia ka sorkar.
“Ka sorkar jylla kan sa wad ia ki kompeni lane wat kine ki juh ki kompeni da ka jingiateh kaba thymmai ban pyntreikam ia kine ki projek”, la ong u Conrad.
U la ong ba ka jinglong jingman kumba ka long mynta, kam iahap kam long kaba ioh nong, hynrei ka sorkar kan wad lad ban wanrah da ki buit stad thymmai bad shen, kan sa khot ia ka expression of interest (EOI).
U la ong, “Lada pyntreikam ia kane ka projek kumba ka long mynta, ka sorkar kan hap ban thied bording kumba T. 8-9 klur na kine ki kompeni, bad ia kane, ym lah ban pdiang”, u la ong.
U la ong ba ka sorkar ka long kaba khreh ruh ban bynshet ha ka Meghalaya Energy Corporation Limited, ka North Eastern Electric Power Corporation (NEEPCO), lane kano kano ka kompeni.
Tar noh ka sorkar jylla ia ka soskular ba iateh bad ki kompeni halor ka Kynshi bad Khri projek
