SHILLONG: Ki nonghikai skul hapoh ka lama jong ka Meghalaya College Teachers’ Association (MCTA) mynta ka sngi ki la dawa ba u Vice Chancellor ka NEHU u Prof Prabha Shankar Shukla udei ban weng mardor ia ka jingpynbna (Notification) halor ka jingpyntreikam ia ka National Education Policy (NEP),2020.
Haba kren mynta ka sngi sha ki lad pathai khubor, ka President ka MCTA ka kong B. Buam, ka la ong ba ka MCTA kam pyrshah ban pyntreikam ia ka NEP hynrei ka pyrshah namar ba la shu pyntreikam syndet khlem pat don kano kano ka jingpynkhreh.
La ong ba ka jingpynlong ka MCTA ia ka Non Cooperation Movement kadei namar ba u VC u la leh mynthi bad sngap jar halor ka jingdawa ban weng ia kane ka Notification.
“Ka NCM ka dang iaid shakhmat ha kaba ngi kyntait (Boycott) ban shim klas ia ki 1st Semester klas hapoh jong ka NEP,” ong ki nongialam ka MCTA.
Ka kong Buam ka la ong, “ U Vice Chancellor udei ban weng ia kane ka Notification ban pyntreikam ia ka NEP mynta u snem bad dei ban iaid shwa katkum ka Syllabus barim namar ka jingpyntreikam syndet kan ktah ia ki khynnah pule ha kane ka jylla.”
Haba kylli hato kin leit ne em ban kiew sha ka Iing Kashari lada u VC um weng ia kane ka Notification, ka kong Buam ka la ong ba ka jingleit kiew iinglieh iing saw kan shim por da ki snem bad ha kata ka por ki khynnah pule mynta u snem kin sa lyngkrang.
Ha kajuh ka por, ki la buh jingkylli balei ka sorkar bad u VC ki sngap jar halor kane. “ Lada u Myntri Rangbah u ong ba ka jingsngewkhia jong ka MCTA ka long kaba don nongrim, balei haduh mynta u sngap jar,” la bynrap ka kong Amanda Basaiawmoit.
Pyneh ki nonghikai College, dawa na u VC ban pyndam ia ka jingpynbna pyntreikam ia ka NEP 2020
