SHILONG: Ka seng sain pyrthei Khun Hynniewtrep National Awakening Movement ne KHNAM mynta ka 28 tarik Nailar 2023, ka la aiti jingthoh ha u Chief Secretary ka jylla u bah Donald P Wahlang ba ka jingthung ia ka Expert Committee ka dei ban pynkylla beit ia ka Reservation Policy, ym ban shu ong lada donkam.
U nongialam ka KHNAM u bah Thomas Passah u la ong ba ka mat pdeng kaba dawa u paidbah ka long ban pynkylla ia ka Reservation Policy, ym dei ban shu ong ban pynkylla lada donkam. U la iathuh ba la ai jingthoh ban lum ia ki jingai jingmut baroh kiba la ai mynshwa halor ka jingpynkylla ia ka Reservation Policy bad ka jingbthah ha ka kyndon jong ka Expert Committee ka dei ban long kaba shai, ba dei ban pynkylla. “Ngim kwah ba ka Reservation Policy kam dei ban long kum ka kam Themmetor kaba sahteng haduh mynta khlem pat lah ban pynkynriah ia ki kharmetor na Iewmawlong naduh ka MDA-1. Kat nang kloi kat nang bha ban pyndep ia kane ka kam”, la ong u bah Thomas.
Ima ioh kylla ka Reservation Policy, kum ka Themmetor khlem poi shaei shaei: KHNAM
