SHILLONG: Uwei na ki nongwad jingtip paidbah lyngba ka Ain RTI u bah Disparsing Rani mynta ka sngi u la iathuh ba ka Meghalaya Energy Corporation Limited (MeECL) tang ha ka shi bnai ka jingiohlum bai bording na Garo Hills ka long T.10 klur katba na Khasi-Jaintia ka iohlum haduh T.81 klur.
Haba kren sha ki lad pathai khubor, u bah Disparsing Rani u la iathuh ba ha ka 27 tarik, Naitung 2023 u la pan jingtip RTI na ophis jong ka MeECL.
Katkum ka jubab ba la iohlum na ka MeECL, u bah Disparsing u la ong, “ Ka jingiohlum bai bording na ki 5 tylli ki District na Garo Hills ka long T.10 klur ha u bnai Rymphang.Katba na ki 7 tylli ki District jong ka Khasi-Jaintia,la ioh T. 81 klur ka bai thang bording tang ha u bnai Rymphang,2023.”
U bah Disparsing u la ong ba kane ka jingiohlum tang T.10 klur na Garo Hills ka paw ba don eiei sha lyndet.
Nalor kane, u bah Disparsing u la ong ba na ka RTI la ioh jingtip ruh ba ka MeECL ka haduh 144 tylli ki jaka bad ka jingheh ka jaka ka long 6861 akar.
“ Nga buh jingkylli, la ka tnad bording ka don jingthmu ne em ban pynkylla ia kane jaka kum ka Solar Energy. Namar ka jylla Haryana tang na ka Solar Energy ka la lah ban pynmih haduh 4200 Mega watt ka bording,” la ong u bah Disparsing.
Lum bai ding ka MeECL T. 91 klur shi bnai ha jylla
