SHILLONG: Ka Kynhun Myntri jong ka Sorkar MDA- II ha ka sngi Thohdieng ka la pynbna ia ki kyrteng jong 5 ngut ki dkhot ka Expert Committee ban bishar bniah ia ka jingpynbeit thymmai ia ka State Job Reservation Policy ne ka Bhah Thungkam.
Ha kane ka Committee ki don 2 ngut ki riew shemphang kiba hikai ha Shillong, katba 3 ngut kidei na kiwei ki Jylla bad kan pyndep ia ka kam hapoh 12 bnai ne shi snem pura.
Ka nongaiktien jong ka Sorkar, ka kong M. Ampareen Lyngdoh ka la iathuh ba ia kane ka committee yn khlieh da u Justice (Retired) Mool Chand Gargh uba dei u Nongbishar barim ka Madhya Pradesh High Court kum u Chairman, bad ki dkhot ki kynthup ia u Justice (Retired) Dr Satish Chandra uba dei u Nongbishar barim ka Allahabad High Court, u Prof. D. V Kumar uba dei na ka Department of Sociology NEHU, Shillong, u Prof. Chander Shekhar uba dei na ka Department of Fertility and Social Demography IIPS, Mumbai, bad u Prof. Subhadeep Mukherjee uba dei Assistant Professor of Economics and Public Policy IIM, Shillong.
Ka kam jong kane ka committee ka dei ban pule bniah ia ka Reservation Policy jong ka Jylla, bad ban phah ia ki jingai jingmut ha kaba iadei bad ka jingpynbeit thymmai.
Ka la ong ba kane ka committee kan iakynduh ruh ia baroh kiba don bynta ban sngap ia ki jingkwah bad ki jingai jingmut, kynthup bad ki seng sainpyrthei, ki sengbhalang, ki seng treimon sngewbha bad kiwei kiwei kiba lah ban ai jingmut.
Ha kaba kylli ia ka jingbym kynthup ia ki trai ri ban don ha kane ka committee, ka Myntri ka la ong ba ka jingbym thung ia ki trai ri kiba dei ki Khasi bad Garo ka long ban lait na ka jinglah shiliang.
Shuh shuh ka la iathuh ba la buh por ia ka expert committee ban pyndep ia ka jingbishar bad jingai jingmut hapoh ka shi snem.
Lah ban pynpaw ba kane ka jingthung jong ka Sorkar ia ka expert committee ka long hadien ba la mih ka jingdawa kaba jur ban pynbeit thymmai ia ka aiñ bhah kam lane ka State Job Reservation Policy jong ka Jylla.
12 bnai yn pyndep bishar bniah ia ka Reservation Policy
