SHILLONG: Ka Khasi Hills Autonomous District Council (KHADC) ka la kyntu ia ki paidbah ha khappud ba kin mih ha ka sngi ba ki regional committee ki leit ban jurip ia ki jaka ban iapynbeit ia u pud u sam hapdeng ka Jylla Meghalaya bad Assam.
Ka Boundary Committee jong ka KHADC ka la lum mynta ka sngi Thohdieng ia ki khlieh nongsynshar bad ki nongialam shnong ha ki thain khappud kiba don hapdeng ka jingiakajia pud bad ka jylla Assam ban iatai halor ka kam pynbeit pud jong ka kylla kaba ar.
U Chairman jong ka Boundary Committee, u Bah Pynshngain N Syiem uba dei ruh u Deputy CEM ka KHADC ula iathuh ba ka jingialang long bad ki nongsynshar jong ki 5 tylli ki thain ba kynthup ia ka Desh Domreah kaba hap hapoh ka Hima Mylliem, ka Borduar kaba hap ha ka Hima Nongspung bad Hima Nongkhlaw, ka Nongwah Mawtamur kaba hap ha Hima Sohiong bad Hima Jirang, ka Langpih kaba hap ha ka Hima Nongmynsaw, bad ka Block II kaba hap haka Raid Nongtung jong ka Hima Khyrim
U la ong ba ki paidbah kiba shong ha kine ki jaka kidei ban ia mih paidbah haba poi jurip ki Regional Committee jong ka Meghalaya bad Assam ban pynpaw ia ka sur bad ia ka jingkwah ka jong ki paidbah ban don beit hapoh ka jylla Meghalaya.
U Bah PN Syiem ula ong ba ki kot ki sla kiba ka Council kala iohpdiang la kdew shai ba naduh ki snem 1900 la shem ba kiba bun ki jaka ki hap hapoh ka jylla Meghalaya bad kane kan iarap shibun ban pynshisha iaka jingdon ia u pud u sam bad ia ka histori.
Ha kaba iadei bad ki thain ba iakhleh jaidbynriew kaba lah ban mih da kawei ka sur, u Chairman jong ka Boundary Committee ula ong, ba ia kane ka bynta la pynkhamti ha ki nongmihkhmat bad ki khlieh nongsynshar ia kiwei ruh ban neh beit hapoh ka jylla Meghalaya bad pynpaw ba kumba long mynta ki duna bha ki shnong kiba kwah ban hap hapoh ka jylla Assam.