SHILLONG: Ka Mahila Congress Meghalaya ha ka 14 tarik Nailar, kila pynlong ia ka jingthang mombati ha Khyndai Lad ban pynpaw ia ka jingsngewlem halor ka jingjia ha Manipur. Haba kren sha ki lad pathai khubor, ka President ka Mahila Congress Meghalaya ka Kong Joplin Shylla, ka la ong ba lada ka sorkar India hapoh ka jingialam ka BJP ka khein ia ki briew ha Manipur kum kiba shu wan poiwir na Myanmar, na Burma kan sa poi ka por imat, wat ia ki briew kiba dei na Meghalaya ruh kan kynnoh ba dei kiba wan na Bangladesh.
Ka la kyntu ia ki paidbah ban long kiba husiar, ban jied ia ki nongmihkmat bad ki paidbah ki dei ban kyndit bynriew namar ba kan long kaba syier ia ka lawei namar ym lah ban tip ia kaba lashai.
Ka la kynnoh ba u Myntri Rangbahduh ka ri u Narendra Modi um pushe ia ka Manipur bad ka paw kumba kam don ha India.