Shillong: Ka Hynnietrep Achik National Movement (HANM) hapoh ka jingiaplam u bah Lamphrang Kharbani, ka la kyntu ia u bah Pyniaid Sing Syiem ba dei u Chief Excutive Member jongt ka KHADC ba un shim ia ki sien jam ba sa shisien ban pynkhi im biang ia ka nam bad ka buom jong ka Iewduh.
U Bah Lamphrang u la pynpaw ia kane haba iakren bad ki lad pathai khubor, hadien ba ma u lem bad ki dkhot jong ka seng, mynta ka sngi Balang ki la leit ban ia kynduh ia u bah Pyniaid ha kamra treikam ka jong u.
Kane ka jingkyntu na ka HANM ka la jia long hadien ba ka seng ka la lap bad shem ba ka Iewduh mynnor kaba dei ka pliang ja jong ki paid Khasi Pnar, hynrei ha kane ka juk kaba mynta ha Iewduh ka pliang ja ka la kylla noh sha kiwei pat ki jaidbynriew kiba shu wan na shabar.
Nalor katta u bah Lamphrang u la pynpaw ba la ai jingmut ia u CEM ba un bthah ia baroh ki Syiem jong ki Hima, kiba hap ha u pud u sam jong ka council, ba kidei ba kin shim noh ia ka rai ban shna ne ban pynmih ia ki hukum ban khanglad ia ka jingia shong kha khleh khamtam lei lei bad ki bar jylla.