SHILLONG: Ki MP ka liangpyrshah kim lah shah shuh ia ka jingkren iathuh khajna jong u Myntri Rangbahduh ka ri u Narendra Modi ia ki kam bapher bapher ba ka sorkar National Democratic Alliance kaba ialam ka BJP ka la leh, khlem kren eiei halor ka jingjia ha jylla Manipur.
U Modi u la jubab hapoh ka Parliament mynta ka sngi halor ka mat bym shaniah shuh ia ka sorkar ba la wanrah ki liangpyrshah ban dawa ba u dei ban kren halor ka jingjia ha jylla Manipur kaba la iaid mynta sha ka lai bnai kynthih haduh ba la wanrah ia ka jingiaumsnam, ka jingphet shnong jong ki nongshong shnong.
Hadien ba la bun minit ba u Modi u la kren ban ia ki kam ba la leh ka sorkar bad ther ia ki liangpyrshah khamtam ia ka Congress, ka la pynlong ia ki MP ka liangpyrshah ban ieng na ki jaka shong da kaba pyrta, kynkiw kynkaw ban dawa ba u dei ban kren ia ka jingjia ha Manipur.
Katba u Modi u dang kren, ki MP ka liangpyrshah kila halla, kila kynkiw kynkaw da kaba dawa ba u dei ban kren ia ka Manipur. Hadien ba la mih noh ki liangpyrshah shabar, u Modi u la kren tok halor ka Manipur ha kaba ula ong ba ka sorkar India bad ka sorkar jylla Manipur ki iatreilang ban wanrah ia ka jingsuk bad u la byrthen ba kiba donkti ban leh ia ki kam beain kin ym laitlan bad ka ain kan ym mab satia. U la kynnoh ruh ba baroh ki jingmih ki kynrum kynram ha North East, dei na ka jingleh bakla ka Congress ha kine ki phew snem ba la leit noh.