SHILLONG 03, Naitung: Ka HYC Shella Area Unit ha kane ka taiew ka lah ioh ban ai sngewbha da ki shatri bad ki bilor rah um Sha ki khynnah pule ha ki skul bapher bapher jong ka Shnong Shella bad ki shnong ba marjan.
Lyngba kane ka prokram ai sngewbha ka Seng ka lah ioh ban sam ia ki shatri bad ki bilor um Sha kumba 750 ngut ki khynnah pule ha ki dong ne ki Kher jong ka Shnong Shella kiba kynthup ia ka Sohlap, Pyrkan, Jasir, Jamew, Duba, Disong, Rynsong- Katonor, Nongrum, Nongnong bad Mawryngkhong. Lah ioh ruh ban sam Sha ki Shnong ba marjan jong ka Shella kum ka Umkdait, Jatap bad Saisohphan.
Ka Seng ka khmih lynti ba lyngba kine ki jingai barit kin long ki jingkyrkhu ia ki longing bad ki khynnah pule jong ka dong ka thain ba kan nym long ka jingthut ia ka leit ka wan skul ha ka por slap bad kumjuh ruh ba ki khynnah pule kin ioh ban rah ia ka um dih kaba khuid ba suba khnang ba kan nym ktah ia ka koit ka khiah ka jong ki.
Ka Seng ka kitbok kit rwiang ia baroh ki khynnah pula ka Shnong bad ki jaka ba marjan bad ka khmih lynti ba nangne shakhmat ruh Kan nang lah ban noh synniang katba lah ha man la ka por ba ki nong shong shnong ki donkam ia ki jingiarap jong ka Seng. Kane ka long ka kyrwoh na u Wanseibor Diengdoh, General Secretary HYC-SAU.
Ai shatri ei ka HYC Shella ia ki khynnah skul
