SHILLONG 03, Naitung: Ka jingshna ia ka surokbah NH40 na Shillong-Dawki kan shim por biang mynta hadien ba ki kompeni kiba la ioh ban shna bad kiba la dep sdang ia ki kam jongki, kila phet lut mynta.
Ha ka jingiakren bad ki briew ka National Highway and Infrastructure Development Corporation Limited (NHIDCL), la iathuh ba kane ka surok naduh Umshyrpi haduh Dawki, ka don saw package bad baroh ki kontraktor (Company) kila iehnoh ban bteng ia ka jingtrei, kaba la buh thong ban pyndep ha u 2024.
“Ki kompeni baroh kiba la ioh ban pyntrei, kila iehnoh bad mynta hap ban khot tender thymmai ia kane ka surok”, la ong uwei u ophisar ka NHIDCL.
Kawei ka daw kaba pynlong ia ki kompeni ban ieh noh shiteng ia kane ka surok, ka dei namar ba ka sorkar jylla kam pat lah ban aiti lut ia ki jaka na ki trai ban shna ia ka surok bad ki don ki jaka ba poi sha ïing kashari bad ki don pat kiba ki shnong ki iaknieh bad pyrshah ban pyniaid ia ka surok, kaba la buh jingeh ia ka kompeni ban tih ia ka surok.
Ha ka jingshisha, la buh por ban pyndep ia kane ka surok ha u snem 2024 hynrei mynta la hap ban pynjlan biang sha ka 2026. La iathuh ruh ba ia ka tender la khot jong ka package 2 bad 4 katba kiwei khlem pat ktah eiei.
Ha kajuh ka por, ka seng FKJGP Riwar Mihngi mynta ka sngi ka la aiti ia ka jingthoh ha u Executive Director ka NHIDCL u Ajay Verma ban dawa maramot ia ka surok ha ka thain Pynursla ter ter namar ba ka la jot lut kaba la buh jingeh ia ka leit ka wan jong ki paidbah lyngba ki kali ki motor.
U President ka seng u bah Evanfield Khonglam bad u Vice President u bah Teddy Alan Dkhar kila iathuh ba u Executive Director ula pynthikna ban phah maramot ia kane ka surok kaba sniew ha kine ki sngi namar ka jingther u slap.
“Ka jingsniew ka surok ka la buh jingeh ia ka leit ka wan jong ki paidbah nongleit nongwan bad ka la don ruh ka jingjia ha kaba ka kali ka la kylla hapdeng surok na ka jingthliew bad dap um”, la ong kine ki nongialam ka seng.
Phet krad lut ki kompeni ba shna ia ka surok Shillong-Pynursla-Dawki
