Shillong: Ki MDC ka liang pyrshah hynne ka sngi ha Iing Dorbar kila pynpaw ka jingbym sngewhun halor ki jubab ba la ai da ka EM ka tnad Ain ka kong Deity Majaw haba iadei bad ka jingpyntreikam ia ka Khasi Social Custom of Lineage Act.
U Nongialam Liang Pyrshah ha KHADC u bah Titoss Chyne hynne ka sngi ula wanrah ia kane ka mat ha ka kynta kylli jingkylli halor kiei ki sienjam bad ka EC ka la shim na bynta ban pyntreikam ia ka Khasi Social Custom of Lineage Act.
Haba jubab ia kane, ka EM ka la pyntip ba ka EC hi ka pyntreikam ia ka Khasi Hills Autonomous District (Khasi Social Custom of Lineage) Act, 1997, bad ka Khasi Hills Autonomous District (Khasi Social Custom of Lineage) Rules, 2007, katkum ki kyndon kiba la ai ha kane ka ain.
U bah Tistos ula buh jingkylli bynrap, la kane ka EC ka pyntreikam ne em ia ka Amendment Act ,2023 jong ka Khasi Social Custom of Lineage Act.
Halor kane, ka EM ka la ong ba ki kyndon jong 1997 bad ka Rules 2007, bad ki jingpynkylla baroh kiba wan hadien kila wan kyllum lang bad haduh mynta ki iaid beit iaid ryntih.
Ha kajuh ka por, ka kong Deity ka la iathuh ba naduh ka por ba la wanrah ia kane ka Amendment ha u 2023 ki seng kur kiba la wan shakhmat an rejistar ia lade ki long 113 haduh mynta.
Halor ka jingkylli la ka EC ka la thaw ne em ia ka Tribunal, ka EM ka la iathuh ba haduh mynta ym shym la lah ban thaw ia ka Tribunal namar ba ka jingduna pisa tyngka bad kiwei ki jyrwit jyrwat.
Ha kajuh ka por,na ka liang ka MDC ka Nongskhen ka kong Grace Mary Kharpuri ka la ieng bad ong ba ka jubab ka EM halor ka jingbym pat lah ka EC kam ban thaw ia ka Tribunal namar ba hap ban lut ban sep, ka long kaba ialam bakla ia ka Iing Dorbar.
Ka EM ka la pynshai ba ka jingeh mynta ban thaw ia ka Tribunal kadei namar ki don bun ki jyrwit jyrwat bad ka EC ka dang ia pyrkhat kumno ban leh ia kane namar ba haba mynta ki don tang ia ki registrar kiba ban peit ia kane ka kam bad la ai ia u ia ka bor ban peit ia kane ka ain.
Jew ki MDC bym hun ia ka jubab ka EM halor ka ain ba iadei bad ka riti dustur ka KHADC
