Shillong: Ka jingkynsai ka synshar paidbah ka ri Khasi, ka la khring wat ia u Myntri Rangbahduh ka ri barim u Pandit Jawahala Nehru ban wan iuh kjat haduh Sohra ha ki snem ba la leit bad ula shim bynta ruh ban kup knup haba u iohi ia ki briew ki kup knup na ka jingther u slap.
U nonghikai skul ba rangbah ka KJP Girls Higher Secondary School, Shillong uba dei ruh u President barim ka Khasi Jaintia Deficit School Teachers Association (KJDSTA), u babu Kular Khongjirem ula ong ba ym tang u Nehru hynrei u Sardar Valabhai Patel ruh ula wan bad pyrto ba ka synshar paidbah kaba shisha ka dei ha rilum Khasi.
Kum nongkren ba kongsan halor ka phang, ‘Ka jingdonkam bad ka jingkordor ka jingsynshar paidbah ha ri India’, ha Maw u Sam, mynta ka sngi kaba pyllong ka Political Affairs Committee (PAC), Mawkynrew, u babu Kular ula ong ba ka jylla Meghalaya kala ioh nam kaba pynmih ia ki riew shemphang haba ha u snem 1993 u myntri rangbah barim ka jylla bah BB Lyngdoh ula wanrah ia ka MLA skhim, bad ia kane ka nongmuna la bud ki jylla ka ri India baroh kawei bad kumjuh ka Parliament ka ri India ka la wanrah da ka MP scheme kaba treikam haduh mynta.
Ha kajuh ka por, ula pynshai halor ka jingdonbor u paidbah ha ka synshar paidbah namar ba la jied ia ki MP, MLA katkum ka Representation of the People Act, 1951 na ka bynta sans nem.
Ha kajuh ka por, u la ong ba ka ri India ka la wanrah ia ka kyntien secular ne ka jingbym shah niam ha ka por ba long Prime Minister ka Indira Gandhi ban mane laitluid ha ka ri, katba ka sorkar BJP ka la pyrshang ban pynduh ia kane.
U Nehru u kup knup ha Sohra ha ka por ba u wan iuhkjat ri lum Khasi: Babu Kular
