Shillong: Mynta ka sngi, u myntri rangbah ka jylla u Conrad K Sangma ula leit kynduh kyrkieh ia u myntri ka tnad kam pohiing ka ri uba dei ruh u nongialam ka BJP u Amit Shah ha nongbah Delhi.
Kane ka jingleit kynduh kyrkieh u Conrad ia u Amit Shah ka long hadien ba ha kine ki sngi, ka la saphriang bha ka khubor ba kumba 8 ngut ki MLA ka UDP kila iakren ban leit iasoh sha ka BJP kaban ktah ruh ia ka NPP kaba ialam ia ka sorkar MDA-2 ha ka jylla Meghalaya.
Ym lah ban tip kaei ka jingleit kynduh jong u Conrad ia u Amit Shah, hynrei la suba jur ba ka jingkhih phaloh ka sain pyrthei ha ka jylla, ka lah ban dew ka daw kaba kongsan ba u Conrad u leit kynduh ia u Amit Shah.
Katkum ka jingtip, kumba 8 ngut ki MLA ka UDP kiba don ka jingiakren bad ka BJP ki kynthup ia bah Lahkmen, Mayralbon, Balajied, Pius, Mathew Beyond, Synsharkupar L Thabah, Kyrmen Shylla, olan bad ka lah ban poi sha 9 ngut kynthup Paul Lyndoh.
Kawei na ki kyndon kaba iadei bad kane ka sorkar kaba kila buh ka long ban ai shuki myntri kumba 4 ngut ia kine ki MLA nalor ki tnad kiba kongsan kum ka PWD, Tourism bad kiwei.
Kynduh kyrkieh u Conrad ia u Amit Shah, hadien ba khih phaloh ka sain pyrthei
