Shillong: Ka sorkar lyngba ka tnad ka koit ka khiah ka la sdang ban ai injekshon HPV, ban iada ia ka jingpang ka pla khun jong ki kynthei. Ia ka injek yn ai ia kito ki khynnah ba 14-15 snem khnang ban iada ia ki ha ki sngi ba kin poi sha ka jinglong samla.
Ka Dr. Neela .E Kharsahnoh ka Director of Health Services (MI) haba kren sha ki lad pathai khubor, ka la kyntu ia ki briew khamtam ia ki kmie kpa ba kim dei ban ngeit ia ka jingbatai ki hamasai ba kane ka injek kan pynduh khun bad ba ka dei kaba dang thymmai. Ka la ong ba kane ka injekshon kam don eiei ka jingktah bad la dep test bad ka long kumba long lem kiwei ki jait injekshon.
Haduh mynta, 1,800 ngut eiei ki khynnah la dep ai ia kane ka injek ha ka jylla kaba long tang 5 percent bad ka tnad kan leit sha ki skul ban pynshai ia ka jingdonkam jong kane ka injekshon.
Kane ka jingai injekshon kan iaid haduh u Nohprah mynta u snem ha baroh ki Primary Health Centres, Community Health Centre, Dispensaries.
Wat ngeit ia ki hamsaia ba ka pynduh khun, ka injek HPV kan iada ia ka jingpang pla khun: Dr. NE Kharsahnoh
